人氣成漫雜誌邊本最好睇？

歷史悠久 《COMIC企鵝俱樂部》

日本嘅成人漫畫雜誌有唔少，當中亦有唔少屬曇花一現，因此能夠刊出多年而屹立不倒，絕對係實力證明，而最初由辰巳出版社創刊，喺2012年6月30日轉到旗下子公司富士美出版社發行嘅《COMIC企鵝俱樂部》，正係現時日本成人漫畫雜誌中歷史最悠久嘅一本，亦係喺成漫界中有相當重要地位。喺1986年9月創刊嘅佢，先後有上乃龍也、澤野明、宮社惣恭、Maruta、幾夜大黑堂、Cuvie等著名成人漫畫家發表過作品。睇番佢當年嘅創刊號封面，發現同今日成漫雜誌嘅封面畫風有極大分別，可以話係見證住日本成漫界嘅發展。此外，亦有另一本同出版社，喺1988年創刊嘅姊妹成漫雜誌《COMIC企鵝俱樂部山賊版》，係日本成漫界中現存第二歷史悠久嘅成漫雜誌。

人氣超強 《COMIC阿吽》

講到人氣超強嘅成漫雜誌，不得不提《COMIC阿吽》，因為佢唔單止名家眾多，由著名漫畫家兼插畫師深崎暮人主理嘅雜誌封面，更係堪稱海報級嘅佳作。由HIT出版社出版嘅《COMIC阿吽》，前身係主打美少女格鬥題材，畫風走輕鹽路線嘅青年漫畫雜誌《COMIC鬥姬》，不過由於內容踩界關係，故此先後3次被東京都政府檢控，於是出版社喺1996年2月將佢停刊，兩個月後以原班編輯人馬，推出全新兼打正十八禁旗號嘅成漫雜誌《COMIC阿吽》，當中成漫家陣容更係超強，包括成漫界大神師走之翁、魔訶不思議、鈴木狂太郎、幸田朋弘、深崎暮人、KEN等。喺2009年6月之前，雜誌封面都係隨機由唔同成漫家繪畫，自從《COMIC阿吽 8月號》開始便由深崎暮人主理，並且成為成漫迷收集對象。

雲集名家 《COMIC快樂天》

若要數現今日本成人漫畫界中最具人氣嘅雜誌，必然係《COMIC快樂天》。呢本由Wani Magazine出版嘅成人漫畫雜誌，本身係一本喺1973年創刊嘅成人漫畫雜誌《漫畫EROTOPIA》（於2000年停刊），於1994年9月時嘅增刊號。由於佢以貼近當年畫風，以及輕鬆嘅愛情題材為主題，比正刊更受歡迎，翌年8月便成為獨立成漫雜誌。自獨立印刊以嚟，唔少成漫家透過呢個平台獲得巨大嘅成功，好似有破百萬銷量嘅漫畫家鳴子花春、美術感極強嘅Linda、東鐵神、尾崎未來等，而憑住超強嘅成漫家陣容，曾創下單月號銷量超過32萬本，至今仍未有任何成漫雜誌能突破紀錄！此外，自1997年設立嘅「快樂天新人漫畫王賞」，更被喻為日本成漫界中嘅奧斯卡。

見證變遷《漫畫BANGAICHI》

日本嘅成人漫畫發展真係有排講，而透過成漫雜誌《漫畫BANGAICHI》嘅變化過程，可側面了解到當中變化。由Core Magazine於1992年創刊嘅《漫畫BANGAICHI》，最初係主打黑道內容漫畫雜誌《漫畫極道》嘅增刊號，當時書名叫《拍青哥世界》。不過因為名稱問題，同年7月改名做《漫畫 番外地》，內容同十八禁題材一啲關係都冇，反而係搞笑嘅四格漫畫集。眼見成人漫畫愈嚟愈盛行，1993年2月突然改用《漫畫BANGAICHI》之名獨立發刊，同時變成一本純愛唔帶鹹嘅美少女漫畫，1995年4月再次進行改革，變成一本露肉度同慾望度極高嘅十八禁成漫月刊。不過面對網絡發展及市場發展停滯嘅問題，喺2016年7月轉為電子版，並改名做《web 漫畫BANGAICHI》。

創刊號星光熠熠

若然有留意日本漫畫嘅話，都會知道日本有唔少人氣漫畫會先喺一啲好似《週刊少年Jump》、《週刊少年Sunday》等嘅漫畫周刊上發表及連載，因此呢類漫畫周刊絕對係睇日本最新漫畫嘅最前線。原來喺1959年嘅3月17日係日本兩本漫畫周刊，分別係講談社嘅《週刊少年Magazine》及小學館嘅《週刊少年Sunday》創刊日，當年《週刊少年Magazine》創刊號上嘅漫畫家身份雖然已不可考，但《週刊少年Sunday》創刊號中嘅漫畫家陣容卻係星光熠熠，分別有手塚治蟲、寺田博雄、藤子不二雄等，而呢兩本至今仍喺日本漫畫界有舉足輕重嘅地位。為咗紀念呢兩本影響深遠嘅漫畫周刊，於是以佢哋嘅創刊日定為「漫畫周刊誌之日」。

隨住漫畫文化嘅流行，開始有唔少以成人內容為賣點嘅十八禁漫畫雜誌出現，只係呢類漫畫有兩個特色，就係除咗封面一定要包上寫有警告字句嘅封套外，佢哋亦以月刊或雙月刊嘅形式發售。

撰文：魂