13萬美元（約101萬港元）掩口費算多定少？呢個數目喺香港連首期都未夠畀，肯定少到唔恨啦！之但係條數掩住嘅係一位39歲嘅美國熟女脫星又點睇呢？可能好多人認為幾大都攞錢走啦！不過Stormy Daniels考慮歸還保密協議嗰13萬美元嚟換取爆「老特」大鑊自由噃！
點解咁蠢蠢豬？傻啦！Stormy Daniels梗係計過數，爆大鑊後筆數可能翻幾番，區區嗰百萬港元點會放在眼內吖！況且，佢依家人氣爆燈，日日夜夜去Talk騷做嘉賓，連新聞台都爭住搵佢做訪問，出鏡率仲多過拍四仔嗰陣呀！而喺截稿前最新消息，傳聞Stormy Daniels唔只靠把口話當年，仲有相關短訊、照片及影片內容，故事發展真係好睇過四仔呀！不過真假都好，對四仔迷嚟講都冇着數，大贏家似乎只得Stormy Daniels一人，皆因佢對住傳媒「吹水」，呢幾個月嚟其社交網到訪人數多咗幾倍，若然去到年尾，突破百萬不是夢！近日仲有傳媒報道，Stormy Daniels主動刪除不受歡迎粉絲，喺未有「性醜聞」前，阿姐肯定唔會咁做啦！
撰文：祖