喺男士眼中，女王同女神都係用嚟形容一啲外形迷人、氣質高傲嘅索女，而兩者之間嘅分別，在於女王有種權力欲，女神則係令男士甘願拜倒裙下。嚟自南韓嘅女神級索模柳止雅正正係屬於後者，佢迷人嘅樣貌加上火辣身材，實在令男人着迷。
每個見到柳止雅嘅男士，都會被佢一頭短髮加上冷艷嘅形象所吸引，並且留下深刻印象。其實呢位美艷模特兒童年時嘅夢想並非想喺模特兒界闖出一番事業，而係希望成為一位運動員。柳止雅讀初中時，便已擁有高挑身材，所以佢希望成為排球運動員，並接受嚴格嘅訓練，可惜喺練習期間發生多次意外，令膝關節受到重大嘅損傷，令佢不得不放棄夢想。
正當佢陷入人生低潮之際，有朋友問佢有冇興趣兼職做攝影模特兒，皆因佢身材高挑，而且三圍激凸，如此出眾外形相信可以喺模特兒界獲得唔錯嘅成績，同時又可以幫助重新建立自信。起初佢相當抗拒，因為佢覺得自己嘅外形並唔突出，另一方面又覺得好少有模特兒以短髮示人，故認為自己唔適合。經過朋友落足嘴頭游說之後，佢鼓起勇氣去面試，結果成功獲得取錄，對方認為佢絕對有潛質，就係咁樣，佢開始兼職模特兒工作，兩年後便轉做全職模特兒。點解兩年後止雅有咁嘅決定呢？正如佢嘅朋友預料一樣，憑住極具個性又性感迷人嘅身段，好快就吸納人氣，眼見自己作出成績，故此決定未來以模特兒作為自己嘅事業。
轉為職業模特兒後，柳止雅先後喺多個平面廣告中登場，同時佢又化身時裝模特兒於多個時裝展上行騷，憑住獨特嘅冷艷氣質，工作機會愈嚟愈多，2009年開始涉足車模界，成為性感迷人嘅車模，喺釜山同首爾多個跑車、量產車及電單車展上亮相，知名度大增，同時被賽車隊伍睇中，邀請佢成為車隊嘅專屬賽車女郎。由於佢嘅身影幾乎無處不在關係，故此有人稱佢係當時冒起得最快嘅模特兒之一。
2010年事務所推薦佢參加亞洲超級模特大賽，憑住多年喺模特兒界嘅經驗，以及先天出眾條件及氣質，不但奪得南韓分站嘅冠軍，其後更代表南韓喺最終圈中獲得季軍，經過呢次比賽，佢喺亞洲嘅知名度大為提升。不過有別於一般模特兒，獲獎之後會更加努力工作，佢卻選擇慢慢減少工作量，原來大量嘅工作令佢舊患復發，佢亦希望能夠冷靜落嚟，為自己未來嘅發展定下新目標。經過兩年沉澱期後，2013年佢再次發力，憑住成熟女人味嘅氣質，回歸之後嘅人氣更勝之前，同時亦有唔少人對佢產生疑問，就係私底下嘅佢係咪一樣咁冷傲呢？佢笑稱其實只有喺鏡頭前先至會表現成咁，私底下嘅佢其實相當活潑，而佢嘅朋友更稱佢嘅性格相當純真添！
簡介：清新短髮係柳止雅嘅個人標記，不過有人問佢點解唔試吓留長髮，可能會令女人味更濃，佢解釋因為長髮有礙睡眠，原來佢習慣每日都要洗頭，每次洗完頭後都會有濃烈嘅睡意，若然要慢慢吹乾頭髮嘅話，令佢相當煩惱。如果大家想了解阿妹多啲，就要Click入呢個網站喇！
網址：http://cafe.daum.net/chicEUN
出生地：首爾
身 高：177cm
三 圍：34-25-36
撰文：魂