有一檔大牌檔，賣牛雜粉麵，檔口附近，有間架步，日日都有幫襯，小姐、人客、大班都有叫粉麵，一星期找一次數，因為撈女係一星期結一次糧。收帳之責，一向由老闆擔任，但老闆忙過頭，於是派個伙記仔去收數。
是日，伙記仔上到架步收數，收得七十餘元，當中有個囡囡叫做雞仔鳳曰：「哥仔，你叫乜名？」
伙記仔曰：「我叫做阿生。」
雞仔鳳曰：「生哥，你入房我同你傾吓。」帶阿生入房，閂埋門，曰：「人客話我身材唔靚，令我好唔順氣，你嚟品評一下。」一邊講一邊除衫。
伙記仔只得18歲，從來未見過女人剝衫，當堂頂唔順，伸手去摸吓。
雞仔鳳曰：「唔得，我叫你睇吓而已，人客摸我，要畀錢o架，咁啦，人客收五十，我優待你，收三十啦。」
阿生曰：「三十就三十。」過水之後，雞仔鳳乃教佢做人。
是日，阿生收數收得耐咗，收足成個鐘至返去檔口，老闆叫交數，佢欠三十元，總係交唔出，老闆心知肚明，因為架步囡囡以前對佢施展過兜生意呢招，不過佢唔上當，問曰：「你係咪學人哋玩女？」
阿生點吓頭，自認難抵誘惑。
自此之後，老闆唔派阿生去收數，只派佢送外賣，阿生終於辭工，話打份工唔夠去架步找數。
大牌檔冇人送外賣，逼住老闆娘都要出動。
老闆娘三十零歲，唔靚，但係身材幾好，一日，事頭婆曰：「老闆娘，想唔想搵多少使用，今日唔夠小姐，人客爆棚，你客串做一個鐘，搵番幾十元都好。」不由分說，推佢入房，老闆娘怕醜，但見人客幾靚白淨，姑且坐吓，結果做成生意，事後，人客畀三十元，事頭婆又拆帳十二元，眨吓眼賺咗四十二元。
架步事頭婆曰：「咪幾好囉，又賺到錢又開心。」
從此之後，老闆娘送外賣送出癮。
一九七六年四月二十七日