近年日本嘅成人遊戲屢屢被人批評故事冇特色或創意，簡單嚟講即係橋段老土。其實又唔可以話成人遊戲迷要求高，因為老土劇情真係好快玩厭。不過由日本十八禁遊戲廠TinkerBell即將推出嘅新作《Grand Guignol之夜》，就被喻為創意十足，表面係後宮式青梅竹馬愛情故事，背後竟然係有重大陰謀，而隨住劇情發展，更會由純愛變成凌辱，甚至有兇案連場嘅重口味場面。故事講述男主角松瀨渚因為父母要到海外工作關係，害怕一個人獨居，所以回到鄉下居住，事關鄉下有自細玩到大嘅嘅老友萩本一臣，仲有青梅竹馬兼富家千金新堂燈里及其細妹新堂夜海，另外仲有美少女杉江光，以及一臣嘅細妹一葉。懷住期待心情返鄉下嘅松瀨渚，喺火車上幻想可以重回昔日時光。回鄉後，佢不但獲得眾人熱烈歡迎，更跟各位美少女有唔同程度嘅身體接觸。按常理，遊戲發展到呢度已經係尾聲，只係劇情嚟到呢度卻畫風一轉，事關松瀨渚回想到3年前嘅一夜，當晚佢接到通知，杉江光嘅父母被人殺害，而杉江光則一身血漬喺街上遊蕩。另一邊廂，新堂燈里兩姊妹嘅父母，亦即新堂家嘅話事人，喺呢晚同樣遇害，兩宗命案看似冇關，卻又好似有種神秘力量將兩件事扯埋一齊。諗到呢度松瀨渚突然覺得背後一寒，佢好似搵到當中嘅關鍵！