兩個失業工廠妹，應徵做化妝品推銷員，人事部主任曰：「有兩種職位揀，第一，攜帶化妝品上門推銷，月支交通費二百元，另分佣金百分之三十，做一千銀生意分三百元，應徵者，交按金五十元，由公司給制服及載滿化妝品的化妝箱，於離職之日，如無欠數，便會交還五十元按金；第二，做派駐各大百貨公司化妝部的職員，負責指導客人化妝，並推銷化妝品，月薪四百元，另分佣金百分之二十，但必須先行受訓一個月，學習指導客人化妝，及如何使用化妝品，於三天受訓期間，如認為不感興趣，可以無條件離職，如認為有興趣，便要交保證金一百元，受訓完畢，必須在公司工作最少三個月，否則會沒收保證金，工作滿三個月之後，則將保證金發還。」
兩個工廠妹，認為學習做化妝師制得過，起碼有四百元底薪，另抽佣，每月有六七百元收入冇走雞，何況又可以學一門傍身技術，於是都選擇第二項，佢哋兩人，一個阿萍，一個阿英，參加訓練班後，上課者有十幾人，三日後，剩番九個。
導師係一位太太，先教佢哋自己同自己化妝，如何畫眉，如何塗眼蓋膏，然後互相替對方化妝實習，即係你同我化，我又同你化。
一周後，導師曰：「第二課係髮型，你哋可以選擇假髮，然後配合髮型化妝。」
兩星期後，九個少女都覺得自己靚咗好多，完全唔認得自己，導師曰：「開始考試，喺一間夜總會進行，你哋要在客人跟前出現，睇吓客人是否都讚你哋靚，妝化得好，獲分最高者，優先派出工作。」
所謂夜總會，原來係一間架步，導師係老闆娘，佢帶一班新女上陣，介紹畀男客人，成班少女，被鹹濕客人上下其手，又搓胸又摸腰，嚇到呱呱大叫。
導師曰：「唔使驚，有錢收嘅。」晚上拆糧，每人分七、八十元，但有一半表示退出，寧願唔要一百元保證金，至於兩個工廠妹，則認為有千零銀收入一個月，好過做化妝師，從此在架步內當小姐，賣肉賺錢。
以上就係架步吸收新血，招收新人的辦法之一。
現時百業蕭條，經濟不景的情況日益嚴重。年近歲晚，很多工廠都宣告執笠，因此很多工廠妹也被招收到架步內捱世界。
一九七五年二月四日