成日話白日夢嘅想像內容最豐富，查實對男人嚟講，午夜時分嘅妄想先至係最令佢哋興奮，因為呢個時候可以無拘無束咁想乜做乜都得，難怪鹹片網站Pornhub都話，子夜時分最多人睇佢哋嘅鹹網。講開男人嘅妄想，日本有套新款兔女郎內衣，絕對滿足晒男士嘅幻想。
提起兔女郎，總係諗起黑色低胸高衩一件頭內衣，配上黑色兔耳及高踭鞋嘅兔女郎造型。雖然呢套兔女郎裝令唔少男士充滿幻想，但係睇咗咁多年，都想要啲新鮮刺激，因此專門設計妄想商品嘅日本公司Mocolle，便搵嚟日本女Cosplayer設計一套新款兔女郎內衣，並且喺日本眾籌網站集資，而呢款充滿妄想味嘅內衣，最近終於公開發售。呢款由Cosplayer「千喜」（せんき）設計嘅兔女郎內衣「Rabbit Lingerie」（ラビットランジェリー），靈感嚟自兔女郎造型加上內衣設計而成，整套內衣唔單止係兔仔頭形嘅胸圍，加西洋風味嘅底褲咁簡單，仲附送兔耳頭箍、衣領、領呔、手袖及黑色魚網絲襪等，可以話係配件多多。萌味十足嘅設計固然吸引，今次Mocolle仲搵嚟超可愛嘅Cosplayer伊織萌衣做模特兒試着，令呢套內衣更具魅力！有興趣嘅話，不妨買番套，售價8,950日圓（約627港元）。
男人睇鹹片係天經地義嘅事，而家陣上網就有得睇，非常方便。大家又知唔知邊個國家嘅男性花喺網上睇鹹片嘅時間最多呢？美國成人影片網站「Pornhub」最近公布咗上年全球用最多時間瀏覽佢哋網站嘅國家排名，根據數據顯示，第一位係菲律賓，平均用咗13分28秒，第二位係南非，平均係11分2秒，第3位係美國，平均係10分鐘33秒。至於自家都有AV推出嘅日本，則排喺第20位，平均係7分50秒。不過大家要留意呢個數字，係以每個國家瀏覽時間除以嚟自該國瀏覽網站人次而得嚟。既然係咁，邊個國家嘅網友瀏覽「Pornhub」網站最多呢？頭3位順次序分別係美國、英國同印度，而第4及第5位則係日本同加拿大。數據又顯示，網民上網睇鹹片嘅習慣相當有規律，一般喺晚上8點到凌晨2點之間，而子夜時分更係高峰期。若然從星期一至日嚟睇嘅話，星期五相對少人睇，星期日則係最多。
由於男女嘅生理結構唔同，故此喺每次性愛當中，男人一般都係得一次高潮，而女性則能獲得多次高潮。喺美國營運一間專門研究性愛問題實驗室嘅Nicole Prause博士提出一個疑問，就係女性應該要有幾多次高潮，先至可以令佢哋嘅身心都得到好處呢？經過長達10年嘅研究發現，女性透過性高潮可以提升記憶力，尤其係對數字嘅敏感度同回憶，都具有改善及提升嘅作用。此外，高潮仲可以令女性提高抵抗抑鬱嘅情緒，並且減低心理壓力，同時可以改善工作滿意及參與度。既然高潮對女性有咁多好處，咁即係做得多就愈好？Nicole Prause博士認同呢個講法，因為從科學嘅角度嚟睇，確實係做得愈多愈好，不過佢補充指由於人體承受量係有極限，所以最好都係從自然層面激發性慾最為恰當，如果要靠藥物及其他方法刺激性慾，反而會帶嚟副作用。雖然Nicole Prause博士嘅研究講得好似好詳盡，但係對打工仔女嚟講，試問又邊有咁多體力同咁多空間容許無限啪啪啪呢！
撰文：魂