一個走江湖撈女，全盛時期，人客要在海角輪班，坐飛機去排隊，最先係陪一個富商去日本，同遊一周，晚晚喺床上玩到高潮迭起，然後撈女對富商曰：「我細佬喺美國讀書，好想去睇吓佢，如果你得閒，當然最好係陪我一齊去，大概半個月左右。」
富商曰：「我都想陪你一齊去美國，但係我唔行得開咁耐，你自己去啦，回港之日，打電報畀我，我到機場接你。」於是買張機票，將撈女送去美國。
原來撈女已經約定一位名流在三藩市見面，晚晚梅開二度，返到來香港後，「襟兄弟」又爭住洗塵，此時，撈女意氣風發，家中換套五六千銀傢俬，雖然唔算十分合心水，不過是人客送贈，唔要又唔好意思。
踏入中年之後，撈女開始唔得，豪客漸漸走頭，到最近已經唔止唔得，簡直係唔掂，冇法子支持二千六百元嘅月租，亦支持唔住兩個女傭嘅人工，先搬間細屋，月租八百元，女傭請一個，大傢俬搬入細屋之後，頓形擠迫，唔係好相襯。
撈女有六七個大戶支持，最後剩番兩個，十分吃力，埋年時候，女傭人工要出雙糧，無能力應付，於是打電話畀其中一個人客阿福，曰：「我好唔掂，你即刻送五千銀過來周轉住先。」
阿福曰：「對唔住，我正在撲水，一頭煙，撲唔掂，我間廠要關門，我知你辦法多，你自己搞掂啦，最好能夠念吓我哋咁耐交情，幫吓我手，撲住十萬八萬畀我。」
女曰：「你唔好講笑，我真係等錢用，如果你今晚唔帶五千元來，以後我唔錫你啦！」
阿福曰：「你現時錫晒我，都唔幫我，唔錫我，亦都唔幫我，咁過咗年至講啦！」
撈女無奈，再打電話畀另一位老闆，曰：「你幾時來見吓我，好掛住你！」
老闆曰：「咁明日你來搵我啦，在高院第三庭。」
撈女曰：「點解，犯官司？」
老闆曰：「欠人哋好多錢，畀人告到上法庭，今次我破產啦！」
撈女黯然，知道財路皆斷，只得取出頸鏈，叫女傭去金舖熔咗佢，女傭收得雙糧後，曰：「小姐，我辭工了。」撈女不禁流淚。
一九七五年二月十一日