如果屋企有個浴缸嘅話，冬天最好嘅活動莫過於浸番個泡泡浴。日本就有一種泡泡浴服務，不過大家咪以為真係浸浴咁簡單，查實佢係日本風俗服務嘅一種，而提供呢種服務嘅風俗孃更有個特別名稱，就係叫「泡姬」。
以前日本風俗業唔係叫「泡泡浴」（ソㄧプランド），而係叫做「土耳其浴」（トルコ風呂）。之所以叫土耳其浴，原來係同嚟自土耳其地區，被稱為「土耳其浴」嘅蒸氣浴方式有關。話說歐洲傳統嘅土耳其浴場男士專區中，有男浴師為男客人提供全身按摩、修剪鬍鬚及修甲等服務，而部分招待外國男客人嘅土耳其浴場，則換成女浴師為男客人服務。日本人許斐氏利試過呢種獨特洗浴風味後，覺得引入日本嘅話大有可為，於是喺1951年於銀座開設首間土耳其浴場「東京溫泉」，場內由女浴師為客人提供服務。
正因為由女浴師侍浴關係，結果被風俗業睇中，將佢變成一種提供色情服務嘅另類土耳其浴，而呢個亦係點解泡泡浴場最初稱為土耳其浴嘅原因。由於其玩法特別，加上提供獨立房間服務關係，故此打正旗號玩「土耳其浴」嘅風俗店愈開愈多，從1953年全國90間，發展到1966年有706間，而喺2008年更係多達1,249間，成為主流風俗店之一。
80年代初一位喺東京大學留學嘅土耳其學生Nusret Sancakli，得悉日本嘅土耳其浴竟然係風俗服務之後，覺得侮辱咗自己國家嘅正宗土耳其浴，於是向日本厚生省提出改名訴求。隨住媒體大力報道，1984年10月「橫濱市特殊浴場協會」率先取消「土耳其浴」呢個名稱，神戶市及愛知縣嘅特殊浴場協會亦跟住取消，並以「特殊浴場」、「特浴」、「湯房」等作為過渡名稱，而「東京都特殊浴場協會」則向民間徵集新名稱，並於同年12月19日召開記者招待會，宣布從「浪漫浴」（ロマン風呂）、「浮世浴」（浮世風呂）等2,400個名稱中，選出從英文「Soapland」音譯成嘅「ソㄧプランド」（即泡泡浴）作為正式稱呼，而從事呢類風俗服務嘅風俗孃，亦從過往嘅「土耳其孃」（トルコ孃），改名成「泡姬」或「Soap孃」（ソㄧプ孃），改名風波亦告一段落。
講咗咁耐泡泡浴，其實呢種風俗服務有乜嘢玩呢？其實只要睇過關於泡泡浴場題材嘅AV，大概都會知道係點玩。首先泡姬同客人剝晒光豬，然後一齊洗白白，跟住客人瞓上水床，泡姬便會用沐浴露或潤滑劑搽勻客人全身，不過唔係用雙手搽，而係用盡身體各個部位幫客人搽，從而達到挑起情慾嘅目的。至於收費方面，大致上可分為3個等級，分別係1萬至2萬日圓嘅激安系、3萬5千日圓嘅大眾系及7萬日圓以上嘅高級系，當然泡姬嘅質素及服務內容會跟價錢成正比。另外，泡泡浴風俗店有兩項特色收費，分別係入浴料同服務料，前者即係入場費，係歸畀風俗店本身，而後者則係泡姬嘅服務費，由囡囡袋晒，正因為咁，部分泡姬會偷雞同客人玩「本番」，即係啪啪啪，不過僅為熟客提供。
雖然現今日本有過千間泡泡浴風俗店，但講到老字號兼人氣高嘅話，便要數位於著名紅燈區吉原嘅「夕月」。開業超過40年嘅佢，唔單止係當地老牌泡泡浴店，喺日本更係數一數二嘅老牌名店。佢之所以能夠經營咁耐，係因為打從開業起，便將風俗店定位做一間高級泡泡浴店，為咗令間店睇起嚟更加豪華，店內裝潢以古典西方風格設計，配以大量吊燈同傢俬，同時設有多個超豪華休息室，而獨立房間嘅設計同樣精美，配合高質素嘅泡姬，難怪入場費25,000日圓（約1,750港元）咁貴，仍深受客人歡迎。
撰文：魂