有間架步，其中一個小姐，枱腳旺到好交關，十個人客入來，佔咗五個係佢嘅熟客，做撈女，熟客多過頭亦好麻煩，最理想當然係分班來，星期一至日，拉勻日日來幾個，更適宜係日夜分班，但人客冇咁生性，所以紅小姐周時倒瀉籮蟹，一來就五六個客，恨不得自己有幾個化身，分別應付。
人客一心來捧紅女場，聽見大班話要等好耐，自然無癮而去，因此日中走失唔知幾多客。
老闆與紅女商量，今後陪人客入房，唔好搞咁耐，可否以半小時為限，三扒兩撥做完就撤退。
女曰：「咁搞法，一定變日本郵船遲早完，我已經度到一條好橋，但要公司合作。」
老闆曰：「講來聽吓。」
女曰：「選幾位姊妹做我嘅助手，凡係我嘅熟客來到，如果我未得閒上枱，就由呢幾位姊妹之中，派一個人去打招呼，陪佢坐。」
老闆曰：「客人會唔答應。」
女曰：「姊妹埋去，話明唔係起鐘上枱，只係來陪人客坐吓，人客自然無拒絕之理，呢幾位姊妹，公司支底薪，另外由我津貼，人客如果大方，計埋姊妹嘅枱鐘，當然更加歡迎。」老闆認為此計可以試辦。
紅女選了三個姊妹做助手，是日，熟客來到，分別由三個姊妹招呼，坐埋去就道白，曰：「阿姐叫我陪住你一陣，佢趕快來，我幫阿姐陪你，唔起鐘。」
人客見有便宜，當然來者不拒，三個姊妹，輪流陪紅女嘅熟客坐下，打情罵俏，嬌聲叫聲「姐夫」。呢條計，果然收得，所有來搵紅女嘅人客，冇一個走返出去。而且更有意外收穫，有部分人客被助手姊妹叫兩聲姐夫，叫到骨都軟埋，唔計鐘錢都另外畀貼士，於是，三個姊妹都收入甚豐。
大抵人客去到歡場，都唔想被人稱為寒底，小姐上枱，大大方方話免費，人客就更大方，拉勻十個人客中，只得一兩個寒底而已，紅女就憑呢一招，搵姊妹幫手，能夠將熟客全部留住，汁都撈埋。
講到公司方面，因為紅女嘅熟客全部有入冇出，自然生意滔滔，在淡風之時候，仍然企得住。
一九七五年一月十六日