後宮式嘅戀愛題材，絕對係日本十八禁遊戲界中嘅王道，雖然遊戲嘅內容千篇一律，但係配合萌爆嘅女角色，再加上適量嘅鹽花就一定吸引到捧場客。不過呢個由日本成人遊戲廠Saga Planets推出嘅最新作品《金色 Loveriche》，卻突破傳統扭轉呢個概念，以超多支線嘅劇情，加上變化極多嘅選項，等玩家可以玩出唔同嘅結局。
故事發生喺一個專門培訓未來紳士同淑女嘅貴族學園，為咗令每位學生唔會沾染貴族不良風氣，於是採用住宿制，希望能夠培養出真正具有貴族氣質嘅男女。有一日，嚟自北歐王國嘅公主希爾薇加入學園，作為國家級貴賓嘅佢可以話係古墓派嘅人物，皆因佢除咗鋼琴演奏技巧達世界頂級外，其他嘢幾乎一無所知。而男主角市松央路竟被呢位天才同白癡混合體嘅公主睇中，喺不情不願嘅情況下帶咗入學園讀書。不過最令市松央路頭痛嘅係，堂堂一間貴族學園竟然宿舍冇晒房間，校方為咗安置呢位由貴賓公主帶嚟嘅學生，安排佢入住女生宿舍外圍嘅一間屋。就係咁樣，市松央路每日游走喺各位千金大小姐之間，卻又獲得佢哋嘅青睞，甚至以身相許，一段既搞笑又充滿鹽花嘅生活就咁開始。
開發商：Saga Planets
售價：￥8,800（約HK$616）
撰文：魂