有間寫字樓，老闆喜歡賭馬，周末辦公，係咁意而已，老闆自動與各職員講馬經，邊隻去邊隻唔去，哪一條天線之貼士話贏梗，哪一隻地線之貼士包封蝕本門，職員聽過之後，唔入場者，亦落番條纜，以免執輸。
一次，老闆又講馬經，介紹幾隻冷門，幾條冷連贏，有人信有人唔信，其中一個打工仔就信兩條連贏，二穿三，每條十元，三十元落注，佢哋冇入場賭馬，去咗酒家開雀局，八個人兩枱，摸十六圈，下午，酒家伙記表示馬場爆冷Q，各人知道打工仔買咗，皆向他祝賀，叫伙記留心聽埋尾場，稍後報上又中埋，舉座歡騰，大家停手代佢計吓數，爆晒棚矣，計埋有七八千元收入，個個叫佢請客，打工仔曰：「當然，我發得咁交關點能夠唔請客，不只請，而且要點貴夾唔飽嘅大菜。」於是，白灼螺片、雞鮑翅、焗蟹蓋、蒜子瑤柱甫，另外加支長頸，實行食餐勁嘅，樓面伙記知道貴客中七八千銀碼，都來祝賀。部長曰：「有咁好貼士下次要通知聲至得。」打工仔曰：「得，下次你打電話來我哋公司問貼士，不過今日有件事商量，未收到錢，簽單先得唔得？」部長曰：「得到極。」送單來，各人睇吓，八百七十九元，真係幾貴。
星期一收錢，外圍公司之艇仔來到，各人以為送錢，艇仔曰：「你哋冇人中噃，只係得祥仔中五關位置，收六十餘元。」
打工仔急忙曰：「唔係啩，畀張底來睇吓。」
艇仔將各人落纜之底稿取出，打工仔睇吓，原來寫錯場數，如果唔寫錯場數，就真係中到爆棚，他當堂面青，並非因為輸去三十元，而係在酒家簽落一張九百銀的單唔知點算，結果，有份打雀局、有份食飯之同事，每人科水一張紅底，夾番錢出來去酒家找數。是日，佢哋去飲茶，部長曰：「慶功宴幾多圍，我已經同你哋諗定菜單。」
打工仔曰：「慶鬼慶馬，原來中空寶，輸清光，唉！呢鑊真係杰。」
部長問點解，打工仔冇表情曰：「寫錯場數。」
部長曰：「既然如此，我哋咁老友，對你十分同情，免收貼士，但下次要話貼士畀我哋聽至得。」
一九七五年一月十二日