現在不少扒手進馬場搵食，打荷包之時，注重現錢當然不在話下，更注重有錢收之馬票。
上周末在公眾棚，有個馬迷，跑完第一場馬，歡天喜地，話畀朋友知，已經叫胡，第二場，開跑後，佢興奮到不得了，馬一路跑，佢一路狂呼大叫，過終點後，大叫「得咗，今次孖寶，連贏都中晒。」
朋友曰：「你發達啦，中咗幾多張？快啲去排隊收錢啦。」
馬迷曰：「每樣兩張而已。」伸手入袋摸住，佢着件積恤，馬票就放在積恤袋中，一摸之下，驚叫起上來曰：「點解成疊飛唔見晒？」
朋友曰：「你有冇放錯第二個袋，搵真啲。」
馬迷逐個衫袋褲袋搵勻晒都唔見，曰：「一定係跌咗，今勻慘咯，唔見千幾蚊。」
原來扒手打荷包，一定要探過龍口至落手，有時會探錯，以為係銀包，但到手之時，卻係一個鎖匙包，或者日記簿，但係在馬場做世界就易好多，慳番探龍口，尤其是中咗頭馬而大呼大叫之人，等於話畀扒手知：「我個袋有可以收錢之馬票。」於是，埋去篤佢一篤，在樂極忘形之馬迷，根本唔會留意有人埋來打荷包，於是扒手就馬到功成，佢都去排隊收錢，冇你咁好氣矣。
所以，在馬場買咗飛，睇住跑出頭馬，都不可露出聲色，唔好大聲呼叫，即係唔好話畀扒手知，自己個袋有飛可以收錢。
此外，跑夜馬，中咗尾場亦要小心，因為有扒手、箍頸黨，會去派彩處吼住邊個收錢，如果見有人收到成疊大牛，就會二仔底死跟，散場時，人頭洶湧，肩踵相接，有機會佢哋就埋身打荷包，如果冇機會，就一路跟到有機會落手為止。前幾日，有人在馬場贏大錢，返到屋企之前被人打劫，連四重彩贏番嚟嘅錢都搶劫埋，大概就係尾場收錢時被箍頸黨睇見，所以跟住搵機會做世界，奉勸入馬場發財之人士，千祈要醒目，尤其是尾場收錢之後，要顧前顧後，唔好被人跟蹤，免致因發財變成破財至好。
近年來，治安不好，盜賊如毛，當街搶劫已不算是新聞，何況在馬場這些熱鬧的地方？
一九七五年一月十日