有間百貨公司，本來已經四季大減價，但係從來未真正減過，近來市面購買力弱，生意少得交關，老闆出去行家處查吓，見人哋真係減價，認為不能好似以前一樣，必須真真正正減價至得。
是晚，老闆召集得力之職員曰：「我哋現在真係要賤物鬥窮人至得，否則冇生意，人哋減價，我哋亦應該減價。」
於是，漏夜將各種貨物的價錢調低，豈料調低之後，生意仍未好轉，入來公司的人客，睇多過買，試過一日，營業額只得幾千元，用來交租都未夠，老闆憤然，曰：「估唔到生意真係難做得咁交關。」親自去貨倉調查吓，見有廿五件女裝皮短褸，來價五百五，賣九百六，只賣出一件，男裝名廠T恤十打，來價二百四，賣四百七，賣出三件，乃對營業部主任曰：「我要試吓，賤物鬥唔鬥得過窮人，你將男裝T恤及女裝短皮褸，照來價五折標價。」
主任曰：「咁唔係蝕大本？」
老闆曰：「我要試吓，是否真係人人窮到完全冇錢，所以將價錢降到最低，試吓人客嘅反應。」
營業主任見老闆做生意做到發脾氣，將名貴貨來價照成本五折發售，連忙通知同事，唔好執輸，自己唔買，亦叫親友來搶購，確係抵買到極也。
這家百貨公司，真係將貨價狂減之後，人客立刻增多，擠迫到轉唔到身，認真係其門如市，第一日就做十幾萬元生意，第二日，更加爆棚，人客多到要拉閘，營業額達到廿幾萬。
是晚，老闆曰：「我贏咗，窮人結果鬥唔過我嘅賤物，呢兩日，各位都做得辛苦了。」
伙記曰：「老闆，我哋唔怕辛苦，只想請老闆准我哋嘅簽單分期扣錢，唔好一次過扣晒。」
老闆曰：「你哋買咗好多貨物？」
伙記曰：「幾乎每一個伙記都抵唔住引誘，都有入貨。」
老闆拎結帳單來睇吓，曰：「我暈咯，原來你哋全部伙記，呢個月唔支人工都唔掂，你哋買到飽晒？」
伙記曰：「我哋唔肯執輸，但現在就後悔，下個月伙食都冇晒着落。」
夏灣拿
一九七五年一月六日