有間工廠，過去曾經賺錢，由山寨式小廠，變成略有規模的中型廠，近年生意不好，老闆打算裁員，但係全班伙記同舟，如果要裁走幾個員工，情何以堪，事實上亦唔知裁邊個好，於是一直冇採取行動。
工廠由每周開工五日減為三日，最後改為兩日，奄奄一息，但老闆仍照支付三日人工。
一日，老闆對一班伙記曰：「現時咁嘅局面，大家攬住死，但我無論如何，做到直至捱唔住為止，現在你哋人人唔夠皮，我想提出一個辦法，如果在農曆新年之前辭職，另有去處者，可以支一個月雙糧，但繼續捱呢檔世界者，到年尾時，我唔保證有雙糧，甚至冇糧出。」
成班同事中，只有一個人願意即刻辭職，唔係另有高就，而係想搵多少本錢去做小販而已。
老闆即刻出一個月雙糧，並支足成個月人工畀佢，其餘伙記，表示決心大家一齊捱落去，因為外邊大風大雨，實在冇乜地方好走。
一日，老闆與各伙記研究有乜生路。
有個伙記曰：「我有一個親戚，係洋服師傅，近來佢自己去寫字樓接生意，多到做唔切，我哋何不試試？」
老闆曰：「值得一試，現時收入最穩定仍然係公務員及大機構嘅職員，如果係王老五，就更加願意畀我做新衫，我哋分頭去接洽，價錢定得相宜，或者打開條出路，有得做，好過坐困愁城也。」
於是，分開幾批人去接生意，摸上去政府機關及大公司的寫字樓，由於佢哋價錢平兼上門度身訂造，果然接到多少生意。
人客試過，十分滿意，輾轉都有工開，有一個單位，主管係鬼頭，知其事，亦幫襯佢做一套衫，見價錢咁平，以為唔會有好嘢，及至起貨，則滿意到極，嘆曰：「睇嚟香港之工業家，真係唔會死，咁擅長應付環境，遲吓一定發。」
之後呢個鬼頭，介紹不少生意畀佢哋。
一九七五年一月四日