蘇妹打扮得鬼咁靚，應朋友洪仔之邀，作為晚會舞伴，參加一個除夕晚會，蘇妹唔算靚，但打扮起來，亦唔算醜，論身材則夠晒性感。
舞會有自助餐，有酒水，洪仔飲咗兩杯，加埋舞會之溫馨情調，不禁(興)合合，曰：「今晚我哋唔好返屋企，去搵地方休息吓。」
蘇妹曰：「去邊處，是否去酒店？」
洪仔曰：「你提議去酒店，好極，我哋即刻去。」
蘇妹曰：「你好喜歡我？」
洪仔曰：「當然，我真係好愛你，其實我哋應該共同享受人生。」
蘇妹曰：「你係咪想玩吓，玩完就算數？」
洪仔曰：「你頭腦唔好咁古老啦，大家享受而已，性唔值得咁神秘，人哋外國嘅女仔……」
蘇妹曰：「唔好講外國，我唔係鬼妹，你亦唔係鬼仔，如果你肯同我結婚，就乜都得，玩吓則不必，我要留番畀老公，不能立亂畀人玩。」
洪仔曰：「我係準備向你求婚。」
蘇妹曰：「真唔真？你係娶我則冇問題，橫掂係你嘅人，點話點好。」
洪仔此時(興)到血管爆炸咁交關，幾大都答應咗先，曰：「我哋一於結為夫婦。」
蘇妹曰：「好，我哋走。」
上到的士，蘇妹叫司機開車返去屋企，洪仔曰：「點解唔上酒店。」
蘇妹曰：「何必咁急，去我屋企先。」
蘇妹帶洪仔返到家中，原來屋內未熄燈，兩位老人家都未上床。
媽媽曰：「乜玩到咁夜？」
蘇妹曰：「洪仔話要娶我為妻，我恐怕口說無憑，所以特來向爸爸及媽媽問聲。」
媽媽曰：「呢個就係未來女婿？」
蘇妹曰：「冇錯，就係佢向我求婚。」
洪仔見此情形，連忙棚尾拉箱，話考慮多兩日先至答覆，然後匆匆別去。
夏灣拿
一九七五年一月一日
「棚尾拉箱」指急急地又悄悄地離開。話說以前嘅戲班喺鄉下做大戲要搭戲棚，而演出用服飾衣箱則放喺棚尾。如果演出受歡迎，戲班班主就會從原路離開，等戲班受鄉民夾道送別。若然演出被人柴台，或喺戲班中人得罪鄉下人而被搵上門時，佢哋便喺棚尾偷偷拉箱離開，呢種情況便稱為「棚尾
拉箱」。