有位歌星，自外地來港，滿懷希望，要施展渾身解數，在香港揚威立萬，然後掘番幾斤金返去，但來港後，絕對不如理想，在小銀幕亮過一次相後，再在夜總會客串唱咗一星期，就不為時尚，住在酒店，一籌莫展了。
好彩跑慣碼頭之女人，善睇風色，發覺勢色唔對，就當堂轉軚，搵番一兩個戶口，暫時照住，紅塵十里之香港，有一種人喜歡有多少名氣之江湖女人，自命為江湖玩家，歌星就係碼住一兩個，當係臨時救生圈。
一日，歌星接到一張請柬，係一個陌生男人之姓名，問酒店接待職員，發請柬之人係乜嘢來頭。
接待部小姐曰：「係香港之名流富商，邀請你參加佢嘅宴會。」
歌星大喜，心諗與富商並無一面之緣，竟蒙請柬相邀，可見自己都有魅力，難得有此機會，唔去交際吓唔得，歡喜之餘，突然又想到冇靚衫，於是立刻相約江湖玩家出來，曰：「我要上電視演出一個節目，你咁錫我，一定想我扮到有咁靚得咁靚啦，快啲同我去買衫。」
玩家見歌星開到聲，於是帶佢去買咗一件價值千零蚊嘅衣服。
宴會夜，歌星帶埋請柬，坐的士去到名流府上，向知賓出示請柬，知賓揸住佢張請柬感到愕然，但仍然肅客，女主人過來打招呼，十分客氣。
歌星入屋後，環顧四周冇一個人識，跟住主人來打招呼，名流客氣一番，話幸會，多謝賞面，跟住又去招呼其他人客，歌星惟有發揮其交際天才，自我介紹。
是晚，歌星結識一批名流鉅賈及社會知名之士，臨別，主人送客，話得閒來玩。
過幾日，歌星打電話畀名流太太，聯絡吓感情，但工人話太太去咗街，連續打咗幾日都如是。
原來名流請歌星之帖係擺烏龍，並唔係請佢，而係邀請一位女鋼琴家，因為名字差不多，又住同一間酒店，酒店服務人員不察誤投，歌星去到，主人唔想令佢難堪，將錯就錯，其實唔係想請佢也。
這個烏龍，對於歌星則有不少幫助，因為那晚她結識了一批名流鉅賈及社會知名人士，時常借故與他們往來，亦有不少收穫。
夏灣拿
一九七四年十二月二十七日
「肅客」係乜嘢意思呢？相信今日唔係好多人識，查實佢解做迎進客人咁解。「肅客」呢個詞語最早用於《禮記‧曲禮》，文中有云：「客至於寢門，則主人請入為席，然後出迎客，客固辭，主人肅客而入。」意思解做：「客人到居室門口時，主人要先入去設席擺坐，然後出來迎客，客人要再三謙讓，主人就恭請客人入內。」