家陣日本十八禁遊戲嘅劇情，真係要絞盡腦汁先至可以吸引到玩家捧場，不過每年都有咁多十八禁遊戲推出，邊度嚟咁多好橋呢？日本成人遊戲廠Hiyoko Soft今次夥拍另一遊戲廠La'cryma，推出最新懸疑成人遊戲力作《消失的世界與月亮和少女》，不但保持鹽度高嘅宗旨，其最大賣點更係充滿劇情，故事嘅靈感嚟自日本家喻戶曉嘅文學作品《竹取物語》，當中更加入查案元素，就算將佢當成非鹹Game嚟玩，仍然具有相當嘅吸引力。
故事發生喺大和國廣瀨郡，一直想查出母親死因嘅男主角沖名誠司，因為跟父親鬧翻關係，所以離鄉已有一段日子。今次佢回到家鄉之後，為免跟父親見面，於是住喺青梅竹馬好友御石美衣奈屋企，點知喺查案期間，佢身邊好友一個又一個離奇死亡，喺某個晚上佢終於見到犯人嘅身影，可惜未能成功將對方捕捉。絕望嘅誠司遇上神秘少女輝久夜，擁有時光回溯能力嘅輝久夜答應帶誠司回到過去，阻止悲劇嘅發生，而誠司更發現只要解開5個謎團，就能夠搵出殺害母親嘅兇手，但卻估唔到，佢所面對嘅竟然係個神秘組織。話說回來，如果唔係睇咗廠商嘅簡介，真係唔知原來故事發生喺古代，但係遊戲角色嘅衣着卻好現代囉！
售 價：￥8,800（約HK$616）
發售日期：2018年1月26日
撰文：魂