有個阿姆，乖仔在加拿大讀書，一去三年，起初家書頻頻，後來一個月不見一封，思念不已，懨懨成病，睇極醫生都唔好，親戚建議佢赴加一行，探吓乖仔。
阿姆確係念子情切，乃去航空公司買機票，另請公司之服務部協助佢辦申請旅遊紙，佢一句英文都唔識，只識講鄉下話，好彩航空公司有華籍空姐，可以妥為照顧。
親友為阿姆送行，見佢兩三件行李，又孭又挽，問曰：「點解唔將行李交航空公司代運？」
阿姆曰：「已經有三件先運去。」原來佢慌死乖仔冇得食冇得穿，好似移民一樣，有咁多帶咁多。
一路順風順水，去到溫哥華，因為早已約定乖仔到溫哥華接機，經過移民局檢查之時，阿姆取出證件，係用一張黃色紙包好，驗過之後就放行，阿姆揸住證件唔肯行，話欠一樣嘢未交番畀佢。
移民局之職員唔知阿姆講乜，因為佢講鄉下話，不禁搖頭，但見阿姆似乎十分焦急，連忙在機場中是但找到一個中國學生，叫佢做傳譯。
學生問過阿姆之後，曰：「呢位太太話欠一樣嘢。」
移民局職員以為真係失咗旅客一件證件，再去驗一次，則見證件齊全，乃請中國學生問佢欠咗乜嘢。
阿姆曰：「欠一張黃紙。」
檢查員記起阿姆確係用一張黃色紙包住證件，以為張紙冇乜用，已隨手丟去。
中國學生曰：「中國人習慣用黃紙寫符咒，或者黃紙係呢位太太認為十分重要之物件。」
移民局職員連忙搵黃紙，原來已掃去垃圾箱，於是幾個人出動，忙咗成個小時，先至將黃紙尋回，用黃紙包番好阿姆嘅證件，向阿姆再三致以歉意。
學生問阿姆，張黃紙係乜嘢咁重要？
阿姆曰：「親戚教我，用顏色紙包住證件，則特別起眼，檢查時一手就取出來，唔使慢慢搵。」
學生曰：「原來只係咁簡單，移民局之職員，畀你嚇到半死。」過關時，阿姆之行李亦免檢查，怕咗佢有符咒也。
一九七四年十二月二十日
文中嘅「阿姆」係潮汕話，意思係「伯母」咁解。至於溫哥華嘅華人，其實有記錄顯示最早到達溫哥華嘅華人可追溯到1788年。當年一位英國海軍艦長兼毛皮商人John Meares（1756年－1809年）喺1788年1月帶咗50名中國籍木工從澳門出發，同年5月抵達溫哥華島嘅Nootka Sound後，便命木工興建毛皮轉運站，而呢班木工下落卻未有記載。