性書你睇過好多，尤其係乜乜性技體位天書，但係當中有幾多招式你能夠做得到呢？唔可以一口咬定係本書廢，好可能係閣下運用唔到啫！至於今日介紹呢本書，相信有過性經驗嘅男女都會睇得明，皆因作者表示書中嘅所有招式係經過無數次反覆測試，唔敢講100%令女方高潮滿瀉，但只要你生理正常，都可以話嚟就嚟喎！雖然書名《101 Sex Positions to Make Her Scream》娘到爆，但係架勢在有101招式，人生在世，即使連AV男女優都未必挑戰過咁多招式，你話學到一半，仲唔係性愛達人呀？
不過呢本書嘅宗旨係要你學得精，運用到令女方興奮大叫先係目的呀！雖然無圖片教你點執劑，不過每一招都會教你正確方法點做，同時亦有安全提示指引，作者深明初學者未了解招式嘅奧秘，所以希望大家先了解過程中會出現嘅意外，並多加留意，當然唔少得讀者感受分享，雖然人哋會有乜嘢反應，未必同你一樣，但係都叫得個知字吖！
大家一定會覺得，性技呢家嘢係男士有責，本書一定係畀男人睇，咁就錯錯錯！作者多番強調性行為對生理及情緒有好處，同時能增強人際關係、緩解壓力、消耗卡路里等等，而最重要係作者指出經常交歡並唔代表你有很好的性愛體驗，呢點擺明係同自以為是嘅女人講啦，所以男人睇先，女人睇後啦唔該！
書名：《Sex Positions: 101 Sex Positions to Make Her Scream》
售價：約HK$50（電子版）
撰文：祖