有個大老闆，與一個小歌星常有密約偷歡，但兩人都能夠保密，不只守口如瓶，行動上亦好似特工人員一樣，神出鬼沒，大老闆從來不與小歌星出現公眾場所，更不會到香閨訪艷，每次約會，必在唔多起眼嘅小公寓。
有一次，老闆約咗一個人客在大酒家晚飯，七時入席，中午，老闆再致電人客，改為八時，但其他陪客都未知，六時半，老闆先到，對陪客曰：「我要親自去酒店接人客來，以示隆重。」
老闆出門，其實去鄰街一間公寓，早已約定小歌星短敍，見面後，老闆曰：「七時五十分，我就要離開。」
小歌星曰：「來去匆匆，為歡幾何，使人不快。」
老闆曰：「你都唔知我同老婆鬥智，我間公司內，亦有老婆之情報人員，但我唔驚，覺得如此偷情，更加有味，你又咁合作，我認為勝過金屋藏嬌，事實上，我即使收埋你住，亦難以暮暮朝朝。」
小歌星亦認為打失魂波好過列屋閒居，做過冷板夫人，愈係晤敍匆匆，愈係有諫果回甘之味。
且說老闆娘，知道丈夫唔係甘願餐餐鹹魚缽之人，所以防範甚嚴，遍布線眼，周圍都有伏兵，但係總冇辦法查出任何線索，佢又唔信個丈夫咁乖，只有大罵呢班飯桶冇個有用，於是改為請私家偵探。
一日，老闆出門，見有一部私家車，在後面跟住，對司機曰：「我漏低鎖匙，要返去公司先。」
司機開車返回公司，老闆已約定小歌星在一間公寓，乃打電話過去，曰：「你叫定架紅牌的士，再接到我電話，就來工商處橫門等我。」
老闆打完電話，出門再上車，果然又見有架私家車追蹤，於是叫司機開去工商處，然後叫司機走先，話要等處長會見，入內打個電話畀小歌星，派架紅牌的士來，老闆由橫門出來，上車，直去公寓。
是晚，老闆娘問丈夫曰：「今日成日去咗邊處？好似失蹤一樣。」老闆曰：「在工商處內坐冷板，等候處長召見，等咗幾小時。」老闆娘曰：「算你啦，冇車大炮。」
一九七四年十二月七日（夏灣拿）
「坐冷板」又稱「坐冷板櫈」或「冷板櫈」，意指不被重用或受到冷待。原文出於何處呢？最早使用呢個詞語嘅係明末小說《二刻拍案驚奇》第22回：「郭信不勝感謝，捧了幾百錢……只去守那冷板櫈了。」不過如果講到貼近今日嘅用法，則係清末小說《官場現形記》第17回中有段：「雖然也沒有甚麼大進項，比起沒有發達的時候，在人家坐冷板櫈，做猢猻大王，已經天懸地隔了。」