有啲人好相信第一眼嘅感覺，覺得對方畀到自己最真實嘅印象，難怪南韓模特兒千世羅如此吸引，事關每個男士都認為佢唔單止擁有迷人嘅樣貌，玲瓏浮凸嘅身材更係令人有心跳加速嘅感覺，唔知大家又點樣睇呢位迷人索模呢？
有人認為要稱得上做迷人索模，首要條件必然係畀到人驚艷嘅感覺，呢種先至係最為誘人嘅重點。不過對於千世羅嚟講，佢嘅吸引力並非單憑驚艷嘅感覺，仲有加埋自然流露出嘅氣質。須知道南韓模特兒都會以最惹火嘅造型登場，不過千世羅就唔同，散發出一種自然美，言談舉止落落大方，別有一番味道。而佢亦有別於一般模特兒喺就學期間便已經兼職模特兒工作，佢係出來社會工作咗一段日子之後，才投身模特兒界。畢業後，佢從事市場發展工作，其後因為工作需要，偶爾客串做Model，估唔到因此而被模特兒事務所睇中，認為佢相當有潛質，結果2012年佢轉職成為職業模特兒，開展事業新一頁。
千世羅抱住戰戰兢兢嘅學習態度入行，發覺原來自己需要學習嘅嘢有好多，故此佢先喺攝影模特兒界演出，從中累積更多經驗，結果一做就做咗兩年。經過呢兩年時間浸淫，佢明白到模特兒嘅本質係乜嘢，尤其係肢體語言上嘅變化，更係有深刻體會，而模特兒事務所亦見到佢有相當嘅進步，便安排佢喺釜山嘅賽車場上以賽車女郎嘅身份登場，憑住迷人樣貌及出眾身材，配合大方嘅儀態及優雅嘅氣質，成為賽場上亮眼嘅焦點。
成功嘅處女大型演出令千世羅充滿信心，故冇幾耐佢便以車模身份喺大型車展上站台，人氣亦愈嚟愈高。翌年，事務所推薦佢參加首屆南韓賽車模特兒大賽。須知道呢個比賽，今時今日係南韓其中一個大型選美賽事，而當年首次舉辦時更係聲勢十足，參賽佳麗人數相當多，而千世羅憑住豐富嘅經驗，喺初選時過關斬將，最後更贏得金獎，足見佢美貌與實力並重。千世羅表示參加比賽開始，目的並非為咗奪冠揚名，而係希望能夠提升自己嘅經驗。
奪得冠軍之後，千世羅嘅人氣極速飆升，工作更係接踵而來，吸金能力大大提升，除咗頻頻喺各大車展及賽車活動中見到佢嘅身影外，佢更化身成Show Girl喺各類型電玩展、商品展示會、婚紗展銷會等活動中登場。雖然千世羅嘅事業全面起飛，但係佢仍然未覺得滿足，故喺2016年佢參加另一個賽車女郎選美比賽，結果獲得最上鏡賽車女郎殊榮，再次獲獎令佢嘅人氣再次提升，更連續兩年獲得車隊招手，成為車隊嘅專屬賽車女郎，事業一帆風順呀！
出生地：首爾
身高：172cm
三圍：34、25、35
簡介：隨住模特兒經驗不斷累積，千世羅嘅演出變得游刃有餘及多元化，先後試過冷艷及萌爆嘅造型，最近佢更化身成狂野女郎，以充滿新鮮感嘅形象示人。如果大家想了解佢多啲，就要Click入呢個網站喇！
網址：http://cafe.daum.net/chunsera
撰文：魂