男人想鹹濕都要搵個理由畀自己，而最常聽到嗰句就係「唔滾唔知身體好」，但係對於連理由都懶得諗嘅男人嚟講，有時嗰啲性學報告同健康調查便幫到手，分分鐘都可以成為理由。所以話書中唔單止有黃金屋，仲可以搵到合理鹹濕嘅學問添！
日本嘅ACGN界有唔少周邊嘢推出，而十八禁作品嘅周邊產品更係有唔少捧場客，其中一種最受歡迎嘅產品莫過於攬枕，人氣女角色加上三點盡露嘅誘人外形，如此攬枕叫人點可以唔Like？原來攬住佢嚟瞓，仲對健康有益添！早前日本有個健康教育電視節目《Takeshi的家庭醫學》指出，有嚴重鼻鼾嘅人攬住個攬枕瞓嘅話，有助減輕問題。有嚴重鼻鼾嘅人其實有血氧濃度過低嘅問題，若然攬住攬枕瞓覺，則會令人下意識側睡，呢個動作可以令血氧濃度維持喺百分之九十五以上嘅高水平，同時可避免出現窒息。日本網民睇完呢個節目後，非常期待將於12月中推出由日本十八禁漫畫家水敬龍設計嘅「O形腳攬枕」，佢最大嘅特色除咗係半裸兼胸前激凸嘅動漫女角色外，O形腳嘅設計方便用家可以雙腿交叉夾實攬枕，感覺既香艷又過癮。依家就算畀人發現屋企有個咁香艷嘅攬枕，可以大條道理咁話畀人知有助改善鼻鼾問題，就唔怕畀人話變態啦！
早前日本網絡有人將一條條白色呈網狀嘅物體相片分享後，唔少網民見佢長條狀，都以為係新型安全套，又或者係情趣玩具。其實佢係一種海洋生物，中文名稱「偕老同穴」，英文學名Euplectella Aspergillum，係一種屬於六放海綿綱偕老同穴屬嘅海綿，由二氧化矽質嘅骨針交織而成，二氧化矽係石英玻璃嘅重要原材料，所以海綿嘅外觀好似玻璃而被稱為玻璃海綿。事實上，佢嘅外形唔一定呈長條狀，仲有花瓶般嘅矮粗外形。誤會佢同鹹濕嘢有關，固然要打屁股，若然知道「偕老同穴」呢個名嘅由來，更係要打多幾下。「偕老同穴」本嚟係日文成語，形容夫妻白頭偕老，而呢種海綿之所以用呢個成語嚟名命，則係同棲息喺海綿內嘅儷蝦有關。儷蝦細小又脆弱，喺幼體時期，佢哋會以一公一乸嘅方式透過海綿嘅細孔進入並定居，從而尋求一個安全嘅庇護所。不過隨住呢對蝦長大，佢哋再唔能夠從海綿體內出入，結果要成雙成對咁生活並繁殖，直至老死為止，因此日本人便將呢種海綿稱做「偕老同穴」。
男人最怕畀人話持久力唔掂，於是成日吹噓自己有幾勁，閒閒哋做一粒鐘喎！不過專家就話，除非性功能有問題，否則正常嚟講係冇可能做到一粒鐘咁耐。而性醫學雜誌《The Journal of Sexual Medicine》早前發表關於喺男士心目中應該要做幾耐嘅調查，佢哋訪問咗英國、荷蘭、西班牙、土耳其同美國合共474名男士，得出嚟嘅結果相當出人意表，事關綜合呢班受訪男士嘅調查後發現，喺男士心目中最理想嘅平均上床時間竟然係5分40秒！不過大家要留意，呢個係平均時間，若然分開幾個國家嚟睇嘅話，英國男士平均理想時間係11分鐘，美國則係10分鐘。雖然男人心底裏希望係11分鐘以內，但該雜誌卻表示喺2004年針對女性進行關於男士應該做幾耐嘅調查中，女士希望男士最好能做到25分鐘嘅前戲，同埋14至16分鐘嘅床戰。如此差距對男士嚟講有好大壓力，但係專家表示男士只要花多啲時間喺前戲、慢節奏嘅活塞運動同埋經常轉換體位，便可延長作戰時間。
撰文：魂