如果係島上得你一個男人同N咁多個女人，你會揀邊個呢？呢個問題經常出現喺男人間嘅對話中，而日本十八禁遊戲更係鍾意將佢作為題材，好似呢隻由Cube最新推出嘅《世界充滿了搖曳的心，你的夢想與實現的欲望》，就讓玩家從3位女生當中作出選擇，配合充滿色氣卻又一啲都唔突兀嘅戀愛劇情，令遊戲性相當高。
故事講述裙腳仔伏見葵將會去寄宿，屋企人擔心佢唔習慣一個人生活，於是先將佢送到遙遠海島上嘅學園，等佢學識點樣照顧自己。點解葵嘅屋企人咁放心將佢丟到咁遠嘅地方呢？原來葵嘅父親曾經喺呢所學園工作，因此唔擔心佢嘅安全。葵喺百般唔情願嘅情況下，展開長途跋涉嘅旅程。到達目的地後，葵發現學園嘅宿舍住咗3名美少女，佢哋分別係性格開朗嘅天鳥蓳、溫柔大方嘅水崎月乃同性格冒失嘅高瀨心春，加上一心嚟阻止葵去學園而追到上海島嘅細妹伏見巴，原本變得冷清嘅海島再次熱鬧起嚟，每日嘅活動都相當精彩，有時去潛水，有時嚟個環島遊，有時則喺圖書館尋寶等。過住充實又開心生活嘅葵，漸漸忘記咗最初嚟學園學習獨立嘅目的，直到有日葵突然醒覺，點解呢個假期好似放極都放唔完嘅？原來一切係同小島嘅秘密有關。
開發商：CUBE
售價：￥9,800（約HK$676）
撰文：魂