呢期「些牙」嘅內容真係幾奇情吓，事關只要聽過網絡海盜版AV嘅人，都會聽過有間報稱喺澳門嘅線上賭場，真身卻原來喺台灣！另外，有位日本網民以女友拍AV為名博同情，卻估唔到原來另有內情。不過講到最奇情，莫過於一位有神乳之稱嘅寫真女優，用自己一對成名胸器碎瓦片！
日本女子組合「仮面女子」領軍人物神谷繪里奈，不但擁有迷人樣貌，更憑住一對34G巨乳，而被日本網民封為「神乳G罩杯偶像」嘅稱號。最近佢積極經營個人YouTube頻道，內容相當養眼兼搞笑，當中點擊率最高兼成為網絡熱話嘅，就係呢條名為「哎呀，瓦片裂開了嗎？我用G罩杯試一下！」（おっ•いで瓦って割れるの？Ｇカップで試してみた！），片中神谷繪里奈先解釋由於見到其他人可以用拳頭破瓦片，於是忽發奇想用神乳破瓦片，講完佢就捧起右邊胸用力壓落疊起嘅6塊瓦片上，結果瓦片原封不動，而佢就痛到標晒眼水！回氣後，佢嘗試用左邊胸出擊，跟住索性用雙乳打孖一齊嚟，結果瓦片仍然冇碎，最後佢決定成個人坐落去，瓦片裂咗5塊，不過佢就痛到七彩！見到佢痛成咁樣，網民梗係覺得心痛啦，話晒都係神乳，萬一搞到個胸一片青一片瘀，你話幾唔好睇呢？如果大家想睇片就Click上網喇！
網址：https://www.youtube.com/watch?v=CwHGXjZZ6XQ
早前有位日本網民「無名吹風」（風吹けば名無し）喺討論區中，以「我女友演出AV」為題留言求助，聲稱自己現年21歲，而女友則為19歲，最近發現女友竟然走去演出AV搵錢，家陣自己腦裏一片空白。日本網民見佢講得咁慘情，居然唔係同佢分憂，而係想知佢個女友叫乜名，同埋叫佢分享女友張相出嚟。「無名吹風」留言稱只係知道女友嘅真名，並且分享咗張勁細張嘅相出嚟，然後補充話：「雖然有啲睇唔清楚，但的確係我女友。」縱然張相好細張，卻印證「高手在網絡」呢句說話，事關相隔張相貼出12秒之後，就有網民回覆相中女優藝名叫一之瀨桃，正當其他網民諗緊點樣回應之際，「無名吹風」竟留言話：「原來叫做一之瀨桃，想知道AV女優嘅名時，用呢招就最快，多謝啦！」大家先知原來係一宗騙案。按劇情發展，呢位「無名吹風」應該會被網民鬧爆，事實卻係有唔少人認為佢夠聰明，甚至有人稱佢做「策士」同「智將」。其實想知個AV女優叫乜嘢名，直接用圖片嚟搜尋就得，做乜要欺騙人哋嘅感情喎！
如果大家有聽過「澳門首家線上賭場上線啦」呢句說話，就已經暴露咗你鍾意睇海賊版AV嘅身份，事關唔少海賊版AV嘅片頭，都經常會出現呢句廣告語。不過從11月初開始，相信以後都唔會再喺海賊版AV上再見到呢個片頭，而一切便要從台灣刑事警察局偵九大隊喺幾個月前展開嘅掃蕩線上簽賭行動開始講起。話說經過台灣警方多個月嚟嘅調查，終於喺今個月初破獲咗一個聲稱嚟自澳門嘅台灣違法線上賭場，呢個賭場嘅宣傳手法相當特別，專門喺網絡海賊版嘅AV片頭上登廣告。根據台灣警方指出，所謂澳門線上賭場其實係由台灣人開設嘅非法簽賭網站，伺服器分布喺雲林、嘉義、高雄等地區，並隱身喺民居或以人頭形式開設嘅檳榔攤內。喺行動中警方逮捕咗以28歲黃姓男子為首等14名疑犯，同時扣查咗22部電腦、26部手機、20本存摺、4本教戰守則、會員資料等物證，而警方初步估計賭博活動金額超過14億3千萬元新台幣（約3億6千萬港元）。消息傳出即引嚟台灣網民哄動，並唔係因為原來聲稱澳門嘅線上賭場其實喺台灣，而係估唔到原來睇海賊版AV嘅唔一定係窮人，當中居然係有人有錢到可以進行網絡賭博。
撰文：魂