做人如果有目標，係咪一定可以從中得到快樂呢？其實喺追逐目標嘅過程中，苦同樂都會同時出現，只係能夠令人變得更成熟，同時亦令生命更有得着。好似南韓人氣模特兒申海琳咁，以成為一線模特兒為目標，既可在工作上樂在其中，又搵到自己人生嘅路向。
跟好多人一樣，喺南韓首爾出生嘅申海琳，最初亦係一個冇乜目標嘅人。正當就學中嘅佢煩惱應該搵乜嘢出路之際，佢從事兼職模特兒嘅朋友，見佢擁有迷人嘅樣貌及玲瓏浮凸嘅身材，可以話係集齊模特兒必備嘅條件，於是提議佢不如試吓做模特兒，既可以令生活變得充實，亦可以從模特兒工作中搵到目標。聽到朋友咁講，佢便喺2010年開始兼職攝影模特兒工作。雖然話就話係無心插柳之下入行，但由於佢嘅性格相當認真，覺得既然要做，就要以做到最好為目標，因此佢專業嘅態度，加上迷人嘅外形，好快便深受攝影師嘅歡迎，而佢更以兼職模特兒身份，喺時裝雜誌亮相。須知道，南韓稍為知名嘅時裝雜誌，都偏向搵專業模特兒去試衫，卻鮮有兼職模特兒能夠咁做，故此佢嘅登場不但即時引起大家注意，而佢所屬嘅模特兒事務所，更洽談佢有冇興趣轉做職業模特兒。經過一番細想，申海琳發覺自己其實都幾樂在其中，而喺工作中搵到樂趣之餘，同時也萌起以模特兒作為自己未來事業嘅諗法。正因為咁嘅原故，佢喺2011年正式投身職業模特兒界。不過講到佢轉做職業模特兒後嘅處女登場，卻並非好似一般模特兒咁，以攝影界作為跳板，反而直接以賽車女郎身份，喺首爾舉辦嘅賽事亮相。其實佢嘅事務所有咁嘅安排一啲都唔奇怪，皆因佢早喺兼職時期，便已喺攝影模特兒界中，積累相當嘅經驗同獲得頗高人氣，所以佢一出道不但經驗豐富，而且仲可以直踩賽車界。
雖然申海琳有豐富攝影模特兒經驗，但講到賽車場上初次亮相，今日回憶起仍覺得相當緊張。佢表示最辛苦嘅唔係要喺烈日當空嘅情況下，企喺賽車旁邊擺甫士，而係要識得幾時對住鏡頭，並且全程保持笑容，更要接受現場記者嘅訪問，而以上種種對呢位初次登場嘅賽車模特兒嚟講，絕對係一種龐大嘅壓力。雖然係咁，但憑住佢天生硬淨嘅性格，仍決定硬撐落去，順利過關之餘，更憑住美艷外形而成為當時賽場上其中一個亮眼嘅焦點。成功嘅處女登場，不但令佢嘅人氣再次推高，同時為佢贏得更多嘅工作機會。從呢次演出起，佢便頻頻喺賽場上亮相，同時又可以喺各大車展中以車模身份登場，令佢向成為一位成功模特兒嘅目標邁進一大步。不過成名嘅副作用，卻開始喺佢身上出現。原來縱然佢性格硬朗，好強嘅佢卻敵唔過壓力嘅煎熬，身體開始出現問題。為咗幫自己減壓，佢先後試過做瑜伽、跑步、游水、跳舞，甚至走去學彈結他，不過效果都唔係咁明顯。正當佢唔知點算之際，有朋友便提議佢可以試吓去玩賽車。據佢講，當時嘅佢心諗賽車呢啲咁激烈嘅運動，會唔會令自己更加緊張呢？因此最初並無答應。不過過咗一段時間，發覺自己嘅壓力實在太大，於是便決定試吓，估唔到雖然賽車高速奔馳期間，佢係就係感到極度緊張，但賽完之後嗰種放鬆感卻係前所未有。結果佢不但經常走去賽道飆速度，更愛上呢種運動。雖然佢對賽車所帶嚟嘅速度感情有獨鍾，但佢卻堅持平日路上一定要安全駕駛，若然想玩賽車只能喺賽道上。
簡介：擁有玲瓏浮凸身材，而樣貌亦相當迷人嘅申海琳，喺唔少人心目中係個堅強嘅女性，佢表示其實自己亦有柔弱嘅一面，不過只有佢嘅屋企人及老友先至見過。雖然作為模特兒嘅壓力好大，但佢卻仍然覺得，只要喺工作上獲得滿足感，縱然辛苦仍然係值得嘅。
網址：http://cafe.daum.net/loveshl
出生地：首爾
身高：170cm
三圍：33-23-34
撰文：魂