所謂「出租情人」，玩法就係囡囡同租客扮成情侶去行街食飯，不過究竟係咪真係咁純情呢？相信唔少人內心都有個答案，如果呢種服務真係咁純情嘅話，早前內地就唔會出現有個新婚90後人妻，喺網上發布出租自己嘅訊息後，被老公發現兼家暴啦！事實上，租客既然畀咗錢，梗係希望同囡囡有進一步發展啦，而租客與囡囡喺一定「感情」基礎上，發生超友誼關係亦屬情理之事，而有咗呢把保護傘遮擋，就算真係畀有關方面突擊檢查，都冇有怕。至於點解內地有關方面又唔禁止呢種出租服務呢？因為只要男女雙方唔係以金錢交易，換上其他方法，例如送禮，就已經可以避開有關當局嘅查證，更何況男女朋友之間唔多唔少總有金錢轇轕，所以好難指證佢哋進行不道德交易。有人就提議，與其係咁，不如從法律層面明確界定「租人服務」嘅定義，以及租客與被租者嘅法律責任等。其實講咁多都嘥氣，建基喺金錢交易之上先至會產生嘅關係，本身就已經唔係愛情嚟啦！