唔少人眼中嘅成人小說內容都係令人血脈沸騰，用字相當露骨，最好頁頁都係啪啪啪嘅場面。其實成人小說唔一定要下下搞嘢，或者每頁都充斥住性器官，透過氣氛嘅營造加上優美嘅文字，亦可以成為文學作品。美國作家莎拉‧麥克蓮（Sarah Maclean）不但精於此道，作品備受美國成人小說界讚賞，更得到「文學界橫空出世耀眼新星」嘅成人作家嘅美譽，呢本《脫軌的誘惑》（One Good Earl Deserves A Lover）正係佢其中一本人氣作品，英文版喺2013年1月於美國發行，最近終於推出官方中文版。
《脫軌的誘惑》嘅故事背景發生喺英國維多利亞女王時代前期，並以愛慾與靈魂之間作出抉擇為主題。女主角翡莉珀雖然係一位貴族淑女，但卻熱愛科學，由於佢呢種劃時代嘅獨立個性及科學頭腦，令即使樣貌及氣質兼備嘅佢，一直吸引唔到貴族男子追求，好不容易終於有位伯爵向佢求婚。婚期將至，翡莉珀對婚禮誓詞卻產生懷疑，認為婚姻並非用嚟滿足男人嘅慾望，於是決定進行研究調查，睇吓男人對性慾嘅睇法。翡莉珀找來型男克洛斯作為研究對象，而作為賭場「墮落天使」合夥人嘅克洛斯，認為世間只有風險計算同機會率，因此認為翡莉珀做緊有害而無利嘅蝕本生意。不過當佢面對翡莉珀怪異得嚟卻又充滿誘惑嘅挑逗行為時，卻往往變成把口講唔好，內心卻很想要嘅情況，因此經常掙扎應唔應該同翡莉珀繼續喺埋一齊，至於結局如何，就有待大家自己睇喇。
撰文：魂