啲人成日講要忠於傳統，但係澳洲一名繩縛藝術家將繩縛結合工程學同光影效果，原來喺日本傳統繩縛以外，仲有其他發揮空間。唔想下下講藝術懶高檔，最近網上有兩件掀起話題嘅底褲產品，吸引唔少底褲迷捧場。想知係乜，就要睇吓今次嘅「些牙」喇！
現代繩縛藝術源於日本，因此日本有唔少繩縛藝術家，喺唔少人心目中亦只有日本繩縛師，佢哋所綁出嚟嘅繩縛先至係正宗。其實喺外國亦有唔少出色繩縛藝術家，佢哋更樂於加入特別元素，帶畀觀眾與別不同嘅視覺體驗。好似嚟自澳洲嘅45歲繩縛藝術家Garth Knight，便跳出傳統和風繩縛嘅框框，以超現實嘅繩縛配合各種道具，如石塊、羽毛及燈光，加上運用多種顏色嘅繩，炮製出奇幻嘅繩縛藝術。Garth Knight表示希望將繩縛藝術帶領觀眾走入一個奇幻嘅虛構世界，透過非自然嘅美，帶出豐富與存在感。
原來Garth Knight並非一位天生嘅藝術家，事關畢業於澳洲塔斯馬尼亞大學工程學系嘅佢，最初從事攝影工作，2000年時佢由攝影師搖身一變成藝術工作者，同年佢開始運用電腦及工程學知識，加上蒙太奇攝影方法，創出自成一格嘅繩縛藝術。自2001年開始，佢喺多個畫廊及商業活動上展出個人繩縛藝術。雖然佢嘅繩縛技巧有別於日本傳統繩縛，以及更着重光影上嘅視覺效果，但相同嘅地方在於佢哋都樂於搵嚟裸體模特兒進行表演，卻又一啲低俗感覺都冇，難怪有人稱讚佢為繩縛藝術開拓出一個新嘅境界。
男人之間嘅友情，可以Friend到一條底褲兩份着。而男女感情相當恩愛嘅話，又可唔可以一條底褲兩份着呢？答案係可以嘅。話說最近外國網上熱議一條兩人着嘅底褲「Undies for Two」，大家唔好會錯意，以為係一條底褲兩個人輪流着，查實佢真係一條底褲兩個人一齊着！試諗吓，情侶着住佢一齊生活，嗰種半身緊貼嘅感覺，真係好有Feel！至於底褲嘅尺碼有幾大？資料上冇清楚講明，但係睇過網上有關嘅試着片段，兩名成年外國男女都着得落，相信呢條底褲好有彈性，唔少人都啱着。
其實呢條底褲早喺2015年已經面世，只係一直未被外界留意，及至今年初美國情侶YouTuber組合「Matt and V」，喺網上進行孖住着挑戰一連串動作後，呢條底褲便人氣急升。不過話時話，呢條咁騎呢嘅底褲有乜作用呢？有人話係用作提升男女感情，有人則話其實係情趣用品。不過翻查資料後發現，其實呢條底褲最初嘅設計目的，並非為咗拉近夫妻關係，而係單純地作為異性派對中嘅遊戲道具，即係拉近陌生異性距離的遊戲而設。不過姑勿論佢嘅設計目的為乜，如果作為情侶玩物嘅話，又真係幾過癮。
講到底褲，有唔少相關嘅得意產品，好似呢條超大碼女裝底褲枕頭套，報稱佢根據少女風格設計而成，純白色嘅底褲加上粉紅色嘅花邊，而喺底褲正面更縫有一個小巧嘅粉紅蝴蝶結，果真係少女味十足，只要套喺枕頭就得，好方便！呢個邪念十足嘅枕頭套，闊55cm，長32cm，富有彈力嘅佢可以套喺任何正常尺寸嘅枕頭上。
唔好話心邪，事關呢個枕頭喺日本網絡上開售後，唔少日本網民紛紛留下抵死嘅留言，有人話瞓喺套上呢個枕頭套正面時，畀人一種喺絕對領域邊緣游走嘅感覺，有人則話最希望瞓喺呢個枕頭套嘅背面，可以令人有種漫遊於少女股間嘅遐想，甚至有人認為最適合嘅用法應該係直接套喺頭上。不過講到最啜核嘅留言，就係有人稱呢個枕頭套變得愈污糟，愈令人有興奮嘅感覺。如果大家有興趣，只要付出2,376日圓（約HK$166），就可以將呢個底褲枕頭套帶返屋企。
撰文：魂