腳板底有乜好睇？

展現神秘魅力

女性嘅神秘部位之所以咁誘人，最主要原因係喺正常情況下睇唔到，所以先至會令男士想入非非。不過巴打唔好心邪，今次同大家介紹嘅呢個寫真展，係就係以神秘部位做主題，不過唔係黑三角，而係腳板底！最近日本東京都中央區日本橋久松町展館Yellow House舉行攝影展「那女孩的腳板底寫真展」，主題夠晒另類。事實上，呢個由日本攝影師湯澤祐紀親自操刀嘅攝影展，號稱首個以腳板底為主題嘅展覽。點解會有如此特別嘅主題呢？咪就係為咗展現腳板底嘅魅力囉！為咗展現美少女腳板底嘅「美態」同「美感」，湯澤祐紀搵嚟寫真女優優月心菜、三井瞳等多位美少女做Model，以唔同嘅造型配合多個場景，拍攝出各種展現腳板底魅力嘅寫真，合共有100張作品。

不過大家要留意，入場必須要除鞋，而攝影展門口會提供腳底按摩服務，等大家入場前先按一按腳底穴位保健。另外，展場內有售經美女用腳踩扁嘅麵包「踏Bread」，好惡心？其實呢個攝影展嘅目的，好明顯係為咗吸引「足控」入場，否則邊度會有人鍾意被人用腳踩扁嘅麵包呀！入場費為500日圓（約35港元），開放時間由早上11時至晚上8時30分，有興趣可以去睇吓。

風俗史資料室

對日本風俗業歷史有興趣嘅話，一定要知乜嘢叫做「遊廓」。佢其實係江戶時代官方認可嘅妓院，以圍牆、水溝等所包圍嘅特殊區域以便於管理，亦有遊里、色町、傾城町等別稱。不過日本風俗業有咁長歷史，三言兩語又點可能講得晒，為咗等大家可以更深入了解日本嘅性文化，日本人渡邊豪喺2014年成立出版社「カストリ書房」，專門介紹日本風俗業歷史，之後佢又喺2016年於東京台東區設立實體書店。

原本喺IT公司工作嘅渡邊先生，點解會對遊廓歷史咁有興趣呢？據佢講因為自從日本實施「賣春防止法」後，遊廓拆得就拆，或被改建成其他用途，有感呢種文化有湮滅嘅危機，於是佢便下定決心用3年時間，記錄現時仍然存在超過300間嘅遊廓建築物，推出攝影集《遊廓 紅燈的街區》。作為日本唯一一間專門出售風俗業主題嘅書店，人氣相當高，吸引唔少性文化愛好者及遊客慕名而嚟，而為咗提供更舒適嘅閱讀環境，早前書店喺眾籌網站集資，成功開設新店，更喺店內加設風俗業歷史資料室及茶室，提供性文化文獻查閱及傳統遊廓食品，至於剩餘嘅款項，則作為印製新書之用。

原物大巨乳圖鑑

雖然男人知道35E、36G呢啲Cup數嘅背後含義，但係有幾多人可以一眼就睇得出，眼前對車頭燈屬於邊種Cup數呢？唔通真係走去直接問女士，究竟佢係咩Cup？家陣就有個可以畀大家學睇Cup數嘅機會，日本攝影師須崎祐次推出被喻為全球首本名為《原寸大巨乳圖鑑》嘅攝影作品，一睇書名就知呢本作品嘅厲害之處，在於書中每對車頭燈都係按原物尺寸印製，同時列明模特兒嘅身高、三圍、左右兩邊乳房嘅「π」數、外形係竹筍形定吊鐘形、柔軟度等資料，換言之大家唔需要再估估吓，究竟G Cup係足球咁大定係籃球咁大，仲可以憑住呢啲數據嚟進行分析，以後就算齋睇數據，都可以知道車頭燈到底有幾大。

此外，書中嘅模特兒不但係日本人氣水着女優，仲會按佢哋嘅Cup數而順序由A Cup開始排列，好似A Cup代表有西永彩奈、B Cup嘅西野小春及三田羽衣、C Cup嘅真奈等30位水着女優。不過大家唔好以為可以見識到傳說中嘅Z Cup喎，皆因呢本攝影作品只係搜羅咗A至K Cup而已，嗰啲OPQ等Cup數就冇機會欣賞。話時話，呢本作品相信可以滿足唔同口味胸奴嘅幻想。

撰文：魂