綁住你綁住我日本繩縛文化

繩縛由來

關於日本繩縛文化嘅起源，有日本文化學者認為最早可追溯至日本戰國時代，當時嘅繩縛稱做「捕繩術」、「捕縛術」、「枷術」等。據稱由於捕捉敵人關係，於是發展出用繩綑綁對方嘅武術。從武士用上搏擊術同繩，成功將敵人捉住並綁到實一實，令對方冇逃走嘅機會，因此又衍生出「拷問繩」、「破繩」（即解開繩縛）等技巧。

及至江戶時代（1603年至1867年），由於當年未有金屬手銬關係，故此「同心」（類似現代嘅警察）就以「捕繩術」嚟綑綁犯人。不過大家咪以為求其綁就得，皆因當時對綁犯嘅繩縛樣式亦有嚴格規定，捉到疑犯後要用「早繩」嘅結繩方式，當中包括「速繩」、「仮」、「仮縛」等，押解犯人時要用「本繩」，當中包括「本式繩」、「護送繩」、「堅繩」等。有呢種規定嘅原因，一來係方便大家知道犯人被捕時嘅情況，二來方便其他「同心」識得點樣解繩。要留意，以前嘅繩縛因為用嚟制敵關係，故此要令對方冇掙扎機會，亦有一定危險性，相對家陣講求安全嘅繩縛有極大分別。

大家唔好睇小解繩一項，其實解繩亦有相當技巧，而當中更被視為各繩縛門派中嘅秘技。繩縛門派？冇錯，皆因佢正如唔少武術流派一樣，隨住歷史發展，「捕繩術」衍生出唔少繩縛流派，當中最著名嘅有一達流、方圓流、猪谷流等，每個流派都有自己嘅一套「捕繩術」招式，好似一達流嘅「早繩翅付」、「揚卷」等，方圓流嘅「將真總角」、「本陽十文字」等。據稱江戶時期，繩縛流派超過150個，繩縛方式超過300種。不過隨住手銬出現，「捕繩術」喺明治時期末漸漸消失，唔少流派嘅繩縛術亦失傳，當中更演變成現今嘅愉虐玩法。

京大同好會

雖然知道繩縛同以前嘅「捕繩術」有密切關係，但近年講起繩縛總係同愉虐扯上關係，不過日本有個大學社團卻希望從藝術及人際關係嘅角度，發掘出繩縛嘅新層次價值。以京都大學作為根據地嘅「京大緊縛同好會」，成員唔單止係大學內嘅學生，仲同其他大學進行繩縛上嘅交流，並招攬同好入會。據同好會嘅會員表示，大家經常視繩縛係一種傷害對方嘅行為，但係佢哋卻覺得只不過係施與受者之間嘅信任關係，而透過繩縛可以展現出人類互信，從中明白關注同信任嘅重要性。此外，同好會希望大家能從創作及欣賞嘅角度體驗繩縛嘅美學。同學會唔單止會定期舉辦活動，教大家應該買邊種繩、去邊度買繩同埋應該睇乜嘢繩縛參考書等，同時搵嚟日本著名繩縛師有末剛，跟一眾同好分享繩縛嘅心得，當然唔少得教授繩縛嘅技巧啦！

技巧教室

由於繩縛佢有一定危險性，真係有興趣嘅話，點都要認真去學習至得。位於日本東京墨田區嘅繩縛教室「遊縛民」，正係為咗呢個目的而開設，逢星期一、三及五開班，唔單止為學員提供繩縛專用「染繩」，更設有多個天花滑輪，為已經有一定繩縛技巧同經驗嘅學員，教授更高階嘅凌空繩縛技巧，而呢種凌空花式並唔係有好多地方有得學，佢哋之所以咁大膽，主要原因係每位繩縛師都有相當經驗。據教室導師稱雖然佢哋以教授繩縛為己任，但係佢哋並非為咗牟利，故此學費一啲都唔貴，男學員收費為1,000日圓（約70港元），而女學員收費則為500日圓（約35港元）。不過大家要留意，報名人士必須已成年兼非病患者，另外由於每次開班都相當受歡迎，故此要提前15天報名。

18禁劇場

如果始終覺得繩縛一定要加番啲鹽花，先至有觀賞性，同時卻又僅限於觀賞而唔想參與嘅話，呢間位於日本新宿歌舞伎町嘅和風愉虐酒吧「密蜜Mitsu」應該符合你嘅要求。呢間酒吧喺2013年12月開業，內裏設有多間傳統榻榻米和式房間，供入場人士揀選。雖然話係酒吧，但其實佢似劇場多啲，事關觀眾要畀入場費，男士收費為9,000日圓（約630港元），女士則為2,000日圓（約140港元），而一對夫妻入場費為10,000日圓（約700港元）。當觀眾坐好後，酒吧便會安排繩縛師同女演員入房表演，而演出內容亦相當豐富，從一對一演出到多人集體演出都有。為咗令初次接觸繩縛嘅觀眾能深入認識繩縛，同場更有專人作出解說，加上傳統嘅日本音樂藝術，令觀眾睇得更加投入。不過大家要留意，除非係特定環節，否則演出途中觀眾係唔可以同演出者有任何身體接觸。

撰文：魂