18禁風俗漫畫你點睇？

介紹玩法

風俗漫畫又叫做「風俗體驗漫畫」，大家都知日本嘅漫畫文化影響有幾咁大，而為咗吸引年輕一輩及畀到玩家新意思，故此早喺上世紀末，已經開始有風俗店搵漫畫家炮製風俗漫畫，而內容主要介紹風俗店內嘅玩法，等玩家可以有深入嘅認識，故此當中加入「體驗」兩個字。另一方面，漫畫形式嘅好處在於可以解決風俗孃唔願上鏡，以致冇辦法以拍片方式介紹風俗店玩法之餘，同時又可以深入地呈現床戰嘅畫面。雖然佢係風俗漫畫，但同一般嘅十八禁漫畫一樣，唔可以畫出男女嘅生殖部位。

主打名筆

驟眼睇落去呢個「風俗情報局 Triple A」好似係一個綜合型嘅風俗漫畫網站，但係睇真啲嘅話會發覺佢嘅漫畫數量雖少，但由於佢有專屬漫畫主筆關係，故此漫畫質素比較穩定，令人睇漫畫時唔會因為畫工質素參差而影響閱讀感。事實上，佢被日本網民稱為質素最高嘅風俗漫畫網站，而佢作為幫風俗店進行宣傳嘅網站，當然會隨漫畫附上風俗店嘅地址，同時會講埋相關嘅服務及價錢。此外，佢仲有一個賣點，就係搵嚟極具話題性嘅現役風俗孃兼漫畫家，並曾經發表過漫畫《戀愛豚》嘅紫藤百惠喺網站發表以風俗孃工作及生活點滴為題嘅4格漫畫。平心而論，紫藤嘅畫工只係一般，但憑住佢既係漫畫家，又係現役風俗孃嘅身份，就已經夠晒吸引。

數量最多

因為近年愈嚟愈多風俗店樂於以漫畫形式宣傳關係，所以衍生出綜合型風俗漫畫網站。呢種網站嘅特色係佢哋會網羅各間風俗店嘅風俗漫畫，然後喺同一個網站內發布，方便有興趣嘅玩家可以一次過睇晒。講到當中內容最豐富同人氣最高，便要數名為「風俗體驗漫畫Summary」嘅網站。呢個網站唔單止漫畫數量夠多，更會按風俗店嘅類型分類，例如出張、素人孃、治愈系、熟女、手作、泡泡浴等。網站隨漫畫提供埋該間風俗店嘅官網連結，等玩家睇完之後可以直接預約，既清晰又方便。不過由於網站嘅內容都係收集而嚟關係，故此漫畫嘅畫工相當參差。

招聘風俗孃

風俗店唔單止用漫畫嚟吸引玩家嘅目光，亦會用漫畫作為招聘風俗孃嘅方法，讓有興趣投身風俗行業嘅女性，對風俗工作有更深入嘅認識。好似位於日本四國高知市嘅出張風俗店「Diva高知」，以一位有意投身風俗行業嘅女主角，從點解要投身風俗業，到首次出張經驗及工作上點滴，從而帶出風俗孃工作嘅「優點」，就係高收入、福利好同彈性工作時間。此外，又透過漫畫講述入職後同工作時要注意嘅地方，好似風俗孃要留意同風俗店拆帳嘅方式、透過手機社交應用程式接收預約內容及地點等。雖然有日本網民稱佢有啲美化咗風俗工作，但又有人話睇完呢輯漫畫後，令人對風俗孃工作有新嘅認識。姑勿論如何，呢種表達方式卻又真係既生動又形象化。

另類作品

如果覺得呢啲風俗漫畫商業味太重嘅話，其實仲有一本將真實及幻想糅合為一嘅作品，佢就係由日本成人漫畫家五月優喺2011年7月推出嘅成人漫畫單行本《裏風俗真實潛入～走勻全國可疑地點～》。正如書名所講，書中嘅男主角走訪全日本各處涉嫌提供裏風俗（即係啪啪啪）嘅可疑風俗場所，當中包括大阪嘅飛田新地、新宿歌舞伎町等風俗熱點。點解話可疑呢？因為「裏風俗」係一種違反日本風俗法嘅行為，因此男主角就要到處去偵查。五月優透過男主角龜山浩輔嘅遭遇，側面介紹風俗店嘅玩法同禁忌，內容頗為有趣。

撰文：魂