日本成人漫畫家不但要靠好作品嚟搵食，更需要不斷推出新作，以滿足粉絲嘅要求。不過凡事冇絕對，好似成漫家赤人嘅作品數量唔多，但係獲得絕佳口碑，而《Like A Flower》更係其代表作。
於大阪出生嘅赤人，早喺插畫界打響名堂，插畫畫得相當精美，筆下嘅美少女更係萌味十足，加上豐乳造型極之誘人，及後佢畀人睇中，為十八禁遊戲設計人物及情慾場面，就係咁樣佢成為成人遊戲插畫家，先後為《麻煩你對不起》、《掛在那裏》等人氣成人遊戲擔任設計工作。除咗成人遊戲外，佢亦為一般向遊戲設計，當中最著名嘅，莫過於喺2008年9月推出嘅《桃色大戰》。此外，佢更為多本輕小說繪畫插畫，如《閒狼作家是美少女妖怪？》、《Radical ☆ Princess!》等，憑住多個人氣之作，赤人呢個筆名喺日本插畫界可謂冇人不識。
雖然佢喺插畫界有突出嘅表現，但其實佢一直都冇放棄成人漫畫嘅創作，2006年終於獲得喺《Comic P Flirt》發表作品嘅機會，但係由於佢嘅插畫工作太過繁重，以致成漫作品產量唔多，及至2012年先至迎嚟首本成漫單行本《No Girls No Life》，當中萌味少女角色加上有趣嘅劇情，令作品大受歡迎，同時亦令佢人氣上升。
不過講到代表作，就一定係《Like A Flower》，佢係赤人第2本推出嘅成漫單行本，書中收錄咗佢喺幾個唔同時段嘅作品，包括《雛山莊與花梨小姐》、《好好睡哥哥×妹妹》、《白×黑 前篇～百合有子的場合～》、《白×黑 中篇～黑咲渚的場合～》、《白×黑 後篇～白百合道歌的場合～》、《柳藤埜的戀愛》、《久遠櫻可能沒有穿底褲》、《秘密的里靜》、《表姊里穗對我來說雖然是個有夫之婦……》、《退房的魔王大人》及《Bad End Route.～雛村築紫可以做偶像嗎？～》等合共11篇，而當中最令赤人及一眾成漫迷津津樂道嘅，卻要數《柳藤埜的戀愛》及《久遠櫻可能沒有穿底褲》。
《柳藤埜的戀愛》中嘅男主角鰥夫小洋係個型男醫生，一直唔知道美少女柳藤埜已暗戀佢多時，而柳藤埜決定設下一個圈套，誓要將小洋嘅心捕獲。有晚小洋突然收到急Call，原來柳藤埜急病復發，當佢趕到現場後，卻得悉原來柳藤埜想趁呢個機會向佢表白，面對柳藤埜坦白示愛，小洋再也禁不住內心慾火，兩人齊齊嚟個激情滾床單。
《久遠櫻可能沒有穿底褲》講述男主角暗戀每朝坐同一班火車嘅不知名少女，其後佢發現當車廂冇乜人時，呢位少女總會坐喺佢對面，而且對方每次都係冇着底褲！有日男主角主動企喺少女嘅身前作遮擋，以防其他人睇到少女走光，兩人就咁打開咗話題。原來呢位名叫久遠櫻嘅少女，暗戀咗男主角好耐，於是唔着底褲嚟引起對方注意，結果鏡頭一轉，兩人已經喺床上啪啪啪！
撰文：魂