或者你冇睇過《性書大亨》呢部戲，但應該聽過Larry Flynt大名，喺1974年Larry Flynt創辦《Hustler》成人雜誌，主要滿足低下階層男士嘅原始慾望，所以佢哋上上下下、台前幕後都唔介意自認低俗，加上Larry Flynt本身出名火爆，多年來最愛同來自各方嘅衞道之士較量。可以同《Playboy》齊名嘅《Hustler》銷量未必夠前者爆，但對色情嘅堅持肯定冇人及得上佢，先前《Playboy》宣布唔再登裸女封面，《Hustler》睬你都傻，依舊四點大解放，兼且不時有料爆，好似喺2013年美國佛羅里達州英文女教師Olivia Sprauer被發現以Victoria James藝名拍比堅尼寫真，結果搞到連份工都冇埋，而《Hustler》鍥而不捨Call爆阿妹拍全裸寫真，起初當事人一口拒絕，仲踩《Hustler》頁頁都係「腿張開」超低俗，點知最後阿妹竟然主動獻身，嗰期封面阿妹左手遮住右邊大咪咪，引起全美瘋搶，認真巴閉！但都唔及周年紀念號咁威水，封面囡囡被美國旗包頭遮臉，淨係露出雙眼及「南半球」半點咁大把，政治味濃到爆，而同老特唔妥嘅Larry Flynt不諱言今期主題為「Freedom First」，一本咁夠薑嘅鹹書可以撐到今日真係買少見少！你愛自由？今日睇咗未先？