日本邪氣地名下一站嗰度……

女體入口 長野縣駒根市

當大家睇到「女體入口」呢個名時，會聯想到乜嘢呢？嗱，唔好心邪呀，「女體入口」其實係位於日本長野縣南部，駒根市嘅赤穗駒根公路交匯處前嘅一個巴士站，而非心邪人士所諗嘅女性重要部位。不過點解呢個巴士站名咁奇怪，令人產生遐想呢？據稱以前喺呢個巴士站所在地，叫做「女體村」，其後為咗方便稱呼於是簡稱做「女體」，而當年設置巴士站時，咁啱設喺女體村入口處，故順理成章叫做「女體入口」。由於佢個名夠晒騎呢又充滿粉紅氣息，成為日本人心目中嘅邪念地標之首。

睾丸掉落之谷 靜岡縣菊川市

日文中「金玉」嘅意思解做睾丸，之但係點解日本會有個地方會叫做「睾丸掉落之谷」（金玉落としの谷）呢？呢個位於靜岡縣菊川市橫地城遺址「橫地城跡自然公園」附近嘅山谷，有個咁古怪地名嘅原因有兩種講法：一個係指呢度冬天時積雪極深，男人行過積雪深谷時，會凍到兩粒波子甩咗而得名；另一種講法好似有根據得多，據橫地城跡運營協議會長鈴木勝章解釋，名字由來係同12代橫地城主橫地太郎長泰喺永享10年（公元1438年）設立嘅訓練士兵方法有關，士兵會先集齊喺橫地城嘅膝蓋谷（膝つき谷），當橫地城上敲擊太鼓嘅同時，會從城上拋下金色嘅波（日文稱之為「玉」），然後士兵就追住個波，邊個士兵能夠喺到個波碌到谷底前最先搶到嘅話，就獲得獎賞，因此呢個谷底就被名為「金玉落としの谷」。其實當中嘅「金玉」並非指睾丸而係指金色嘅波，只係後嚟啲人諗多咗啫。

乳頭 秋田縣仙北市

「乳頭」呢個地方名係咪夠晒惹人遐想呢？佢位於秋田縣十和田八幡平國立公園內，之所以有個咁嘅名，係因為公園內有個「乳頭山」而得名。顧名思義，呢個高達1,477.5米嘅「乳頭山」外形同女性心口兩點相似而命名。另一種講法係因為呢個山脈會流出乳白色嘅溫泉水，因而得到呢個名字。正因為呢度有大量特色溫泉泉水關係，成為日本人浸溫泉勝地，並發展成今日嘅「乳頭鄉溫泉」，包括「鶴之湯」、「黑湯溫泉」、「大釜溫泉」、「妙乃湯」等7間溫泉旅館，當中以歷史最悠久嘅「鶴之湯」，及喺登山路線附近嘅「黑湯溫泉」最為有名。

尻毛 岐阜縣歧阜市

日文中嘅「尻」即係指臀部，因此「尻毛」係指臀部生長嘅毛髮咁解。不過呢個位於岐阜縣歧阜市嘅「尻毛」，卻同毛毛一啲關係都冇，大家千祈唔好誤會。「尻毛」呢個名嘅由來，其實係同佢嘅日文讀音「しっけ」有關，呢個詞語係指「濕氣」。原來以前呢個地方經常受到附近河流伊自良川嘅水患困擾，經常被淹浸而變成濕地而得到「しっけ」嘅稱呼。不過，由於呢個詞語喺仲用緊漢字嘅日本年代，冇得用平假名寫出嚟關係，故此有人將佢嘅讀音直接寫成「尻毛」，結果就咁將錯就錯變成今日嘅地名。不過另有講法指，以前日本人命名地方名時，鍾意用人體結構嚟比喻地勢，而「尻」則有末端嘅意思，好似野尻湖、池尻大橋等，「毛」則係形容呢處地方植物茂盛，因此處於伊自良川支流末端兼植物茂密嘅佢，就得到「尻毛」嘅名字。

日本地名點命名？

日本嘅地名產生，除咗根據地貌、特產、人物、建築等而命名外，仲有將一啲日本戰國時期嘅舊國家名沿用至今，好似越前市、伊豆市、美作市等。其實日本嘅地方名曾經過3次大型嘅市、町同村合併，分別係喺明治22年（公元1889年）4月1日嘅「明治大合併」、昭和28年（公元1953年）10月嘅「昭和大合併」同埋2004年3月嘅「平成大合併」，而經過多次合併後，一啲富有特色嘅地方名亦因此而消失。

撰文：魂