啲人成日話電視劇同電影嘅場景，用嚟用去都係嗰幾個，其實喺日本AV中，亦有唔少熟口熟面嘅場景，好似位於栃木縣那須塩原市嘅「不動之湯」就係其中之一。當然又點止得呢個溫泉咁少，部分仲可以租用嚟拍嘢添……嗱！拍乜嘢就自己諗啦！
呢個泳池不少AV迷都一定會見過，名副其實係AV中嘅第一場景！「那個泳池」（あのプール）原名叫做「例之泳池」（例のプール），而「那個泳池」則係日本攝影界中對佢嘅暱稱。佢位於日本東京都新宿區一幢商業大廈9樓嘅片場「Hanazono Room」內，並由日本片場管理及營運公司「pstudio」所擁有。由於佢係一個溫水室內泳池，故此喺任何天氣下拍攝都唔會影響進度，加上開閉式玻璃幕頂設計，採光完全唔係問題，而長達6.6公尺，闊達3.2公尺嘅泳池活動範圍亦相當高，最重要係佢交通便利，租金亦唔貴，6小時租用費只不過120,000日圓（約8,400港元），故此深受AV片廠歡迎。不過呢個泳池並非一開始就用嚟拍攝AV，而係供一般攝影之用，好似特攝片《幪面超人》系列及日劇《世界奇妙物語》亦曾經喺呢度取景拍攝，直至2004年先至開始被用作拍攝AV。至於「Hanazono Room」面積相當大，共分為9樓同10樓兩層，裏面除咗有泳池外，仲設有多間睡房、客廳、賭場等主題攝影廠。
拍AV最重要識得搵場景，但係AV題材有咁多，如偷情、禁室、浴室等，而有啲AV更係一套片玩盡晒咁多個場景，對於資金有限嘅AV片廠嚟講，又點可能租用多個場地呢？唔緊要，有個人氣片場可以一次過滿足晒佢哋嘅要求，就係位於東京練馬區豐玉南嘅「豐玉南Studio」（豊玉南スタジオ）。呢個場地係日本片場管理公司「木下Studio」旗下嘅片場之一，最大賣點就係地方夠晒大，設喺兩層獨立屋裏面，一樓係最為人所熟知，經常喺禁室及凌辱AV上見到嘅「牢屋」，即係監倉，另外仲有風呂浴室、廚房及睡房；二樓則係經常被人用嚟拍攝癡女系列嘅男性大型廁所及多個主題睡房。此外，Studio仲可以因應片廠嘅要求，為對方加添唔同嘅陳設。由於片場內有大量窗門，故此採光相當好。不過對於AV片廠嚟講，最好嘅地方莫過於佢係獨立屋，就算拍得幾夜，都唔使擔心會畀人投訴。事實上，呢個場地除咗用作拍AV外，亦有唔少水着女優會喺度影寫真。至於收費方面，最低消費為12小時105,000日圓（約7,350港元），計落唔算貴喎。
有間便利店經常喺AV中出現，同時亦係男女優激戰嘅性地，究竟邊間便利店會租畀人拍AV？呢間便利店名叫「Plane Mart」，喺現實中並唔存在，因為佢係一間假便利店，屬於日本片場營運公司「planear」旗下嘅拍攝場地，位於東京都板橋區「環七Multi Studio」（環七マルチスタジオ）嘅一樓。便利店場景做得相當逼真，不但有齊貨架、冷凍櫃，而架上同櫃內亦擺滿食物同飲料，簡直係真嘅一樣！不過啲食品全部都係吉盒同假飲品嚟，如果大家細心啲睇嘅話，就會發現不論係橙汁定綠茶，飲料嘅顏色都係一樣。而店內嘅櫃員機最逼真，成個操控介面同真實嘅一模一樣，唯獨佢冇錢吐出嚟。此外，片場提供埋店員制服，分為橙同藍色兩種，真係夠晒貼心！成幢「環七Multi Studio」連埋地牢合共5層，除咗便利店外，仲有辦公室、酒吧、睡房及天台。咁想租呢間便利店拍嘢，究竟場租係幾多呢？原來按片場規定，大家要連埋地牢一齊租用，價錢係12小時150,000日圓（約10,500港元），雖然係貴咗啲，但鬼叫得佢一間便利店咩！
如果鍾意睇人妻、禁斷呢啲AV系列嘅話，就會認得呢間和味十足嘅日式房屋，皆因佢出場嘅次數相當多，但係大家唔好以為呢間屋係布景場地，佢的確係一間獨立屋，而呢間住家片場名叫「sister上鷺宮」，位於東京中野區上鷺宮，其實係日本片場營運公司「Studio Jill」旗下多間獨立屋式片場嘅其中一間。早喺10幾年前，佢已經常被用嚟拍攝AV，雖然曾經多次進行翻新，但仍然保留昭和時期嘅味道。兩層式構造，一樓設有客廳、開放式廚房、廁所、浴室及洗衣房，而二樓設有客廳及兩間和室，另外仲有睡房、廁所同浴室。此外，仲有一個和風設計嘅花園，空間夠晒闊落，方便拍攝。不過因為佢位於住宅區，加上佢真係一間住得人嘅屋，故此收費一啲都唔平，每小時租金由23,000日圓（約1,610港元）起，如果要拍12個鐘，差不多要2萬港元o架！此外，電費同水費亦另計，難怪只有S1呢啲大型AV片廠先至租得起。
唔租片場拍AV梗係得啦！事實上有啲AV片廠會租用民用地方嚟拍攝，尤其係拍攝一啲同居酒屋、快餐店、理髮店有關嘅題材時，佢哋亦會租用真正嘅商舖，以達到真實感。不過租用呢啲場地，第一租金貴，第二係時間要控制得好，否則隨時會「Out筆」。另一方面，對商舖嚟講唔一定會有宣傳作用，反而會帶嚟風險，好似日本有間經常畀人用嚟拍AV嘅居酒屋，畀人起底之餘，仲要畀人彈佢個環境勁污糟，真係得不償失。
撰文：魂