近排台灣警方高調喺各個地方掃黃，令到唔少業界人士風聲鶴唳，尤其係一啲傳統色情服務重鎮，唔少場所紛紛關門停業。而一直以網絡經營為主嘅應召色情服務，卻好似事不關己，其實佢哋並唔知掃黃行動，早就燒到埋身。話說早前台灣高雄橋頭地檢署聯同警方，喺高雄及台中對一個網絡賣淫集團採取行動，破獲以48歲陳男及其33歲蔡姓妻子為首嘅賣淫集團，連同5名集團成員一同逮捕歸案。據悉呢個網絡賣淫集團喺2013年組成，透過社交應用程式拉客，並喺台中同高雄設立數據中心，與此同時設立代調公司、網絡應召站同實體應召站，另外操控賣淫小姐、外送司機、馬夫等，絕對係一條龍式嘅色情營運集團。佢哋嘅運作方式，係先透過手機接聽玩家來電，然後通知代調公司從網絡應召站搵適合嘅小姐，跟住再指定司機接送小姐前往預約嘅酒店進行交易。集團成立至今，不法獲利超過5,000萬元新台幣（約1,250萬港元），而陳男更坐擁多部名貴汽車及不菲嘅資產，加埋現金存款及物業，合計超過3,000萬元新台幣！由於呢個集團規模相當龐大，故此早就引起有關當局注意，經過一連串秘密搜證後採取行動。雖然主腦已經落網，但相關嘅肅清行動仍然會繼續。