經常喺內地玩樂嘅玩家，最怕遇着公安突擊掃場，被罰款都算，仲要被拘留10幾日，試問叫打工仔點樣同屋企人及公司交代呢？屋企人容易話為，自稱要突然出外公幹咪得囉！呢招以前或者行得通，家陣就未必可行，事關早前山東濟南市公安區發布《關於嚴厲打擊涉黃涉賭違法活動整治娛樂場所治安秩序的通告》，呢份通告個名水蛇春咁長，當中一個重點就係，所有因賣淫、嫖娼、賭博而被行政拘留嘅人士，公安局將會依法通知其家屬。據濟南公安局嘅民警稱，由於涉嫌賣淫、嫖娼同賭博嘅人士，最擔心係被社會同屋企人譴責，而以前呢類違法者最多被進行行政處罰，佢哋嘅屋企人未必會知道。有見及此，有關當局決定將呢類違法行為通知有關人等嘅家屬，從而達至一定程度上嘅震懾效果。嘩！唔單止要被行政處罰，仲要揚埋畀屋企人知，試問以後點樣抬頭做人呀？睇番內地網民嘅反應，有唔少人都支持公安嘅做法，亦有部分人認為咁做會破壞人哋家庭。其實如果大家有印象嘅話，喺2006年初，江蘇省公安機關亦曾經實施過呢種方法，但係當時有唔少異議，稱呢種做法會導致相關人等家庭破裂，甚至會鬧出人命嘅可能。不過今時今日，睇番民間嘅反應，卻好似比較接受。唔知呢種做法，能唔能夠起到阻嚇嘅作用呢？