總有人以為對白係漫畫嘅靈魂，可交代劇情及角色嘅思想，不過作為一位出色嘅漫畫家，應該透過構圖、角色嘅表情同肢體語言嚟講故事，日本人氣成人漫畫家Napata正正係箇中高手，佢筆下嘅角色表情豐富，加上甜爆嘅浪漫故事，難怪佢首本推出嘅單行本作品《Lovely Lover's Love》備受好評。
Napata有另一個筆名Okawr，而呢個筆名同佢嘅漫畫生涯有密不可分嘅關係。原來早喺10年前仍然讀書嘅佢，已經喺學校嘅漫畫部開始畫插畫及漫畫工作，除咗一般向漫畫外，佢更愛繪畫成人漫畫。及至2009年佢以Okawr之名參加多個成人漫畫同人圈嘅活動，當中分別有WASABI、Cat FooD、尻娘魂道場等，至今佢仍活躍於Cat FooD。
最初佢以十八禁化人氣一般向漫畫為創作路線，首本推出嘅成漫同人誌作品係喺WASABI上發表改編自人氣漫畫《化物語》嘅《Bluetooth》，其後佢又推出改編自《Dragon Quest》及人氣電玩《偶像大師系列》嘅成人漫畫，憑住甜味極重嘅戀愛劇情，及一眾美少女角色，令人氣不斷攀升。唔少人都認為佢嘅劇情，既無故意大灑鹽花同造作，當中角色表情更係相當自然，不論係談情說愛，定係床上激戰時，角色嘅眼睛同嘴唇都畀到大家一種親切嘅感覺，配合埋恰到好處嘅對白，更係令成漫迷有種置身其境嘅感覺。因此有人稱佢嘅作品雖然口味清淡，但對睇重口味成漫已經睇到膩嘅成漫迷嚟講，卻有一種清新味道。
隨住佢人氣不斷提升，2011年獲成漫月刊編輯邀請，喺《COMIC MEGASTORE》發表首個成漫作品《我很累啊！》。之後，人氣爆升嘅佢又喺成漫月刊《COMIC 快樂天》及《COMIC HOTMILK》發表作品。及至2013年5月終於推出首本單行本作品《Lovely Lover's Love》，而呢本單行本同時被視為佢嘅代表作。
《Lovely Lover's Love》收錄咗佢由2011年至2013年間發表過嘅單元故事，當中分別有《不要叫我做姐姐》、《自那次……》、《自那次……之後》、《Don't leave me...》、《看家的人》、《看家的人After》、《承諾》、《你的小貓》、《鄰居山下小姐》、《要永遠在一起》、《秘密妹妹》及《我很累啊！》，另外仲收錄咗Napata為每個單元故事繪後分享，等大家可以更深入咁認識佢創作過程及角色嘅性格。單行本推出後廣受好評，尤其係書中《自那次……》及《Don't leave me...》。
《自那次……》之所以被人認為係佳作之一，皆因故事純愛到爆。以倒敍方式開始，講述男主角友部同女主角後藤發生完第一次後，事隔一個星期後再次見面，而呢段劇情中友部嘅表情同自白，真係描繪得細緻得嚟又勁真實！當怕醜嘅後藤嚟到後，就輕輕繞住友部臂彎，輕問對方有乜計劃時，結果兩人莫名其妙去咗情侶酒店。一場既浪漫又刻骨銘心嘅第二次接觸，就咁甜甜蜜蜜地展開。
《Don't leave me...》同樣貫徹作者甜甜嘅戀愛風格，故事講述男主角小努為咗搵錢，離鄉半年後終於回鄉，而喺車站度等緊佢嘅，就係苦等咗佢半年嘅女友由美。由美埋怨小努點解半年後先至返嚟，雖然小努用盡辦法氹對方，但由美仍不為所動，最後小努決定使出必殺技，就係狠狠吻下去。呢段描繪由美撒嬌嘅情節，既動人得嚟又溫馨。其實佢喺2015年11月推出嘅第二本單行本《Pandemonium》同樣備受好評，大家有興趣可以睇吓。
漫畫名稱：《Lovely Lover's Love》
作者：napata
出版：Wani Magazine
頁數：216頁
撰文：魂