唔少人睇日本嘅成人漫畫時，除咗留意女角色外形同鹽花場面外，亦注重成漫家嘅畫風。好似成人漫畫家utu就憑住清新嘅畫風同簡潔嘅線條，而備受成漫迷追捧。作為佢嘅首本單行本作品《發情情意結》，大家又點能夠錯過呢？
雖然utu喺成人漫畫界擁有相當高人氣，但其實佢從執起畫筆時開始，從未諗過自己會喺成人漫畫界中發展。當年活躍於一般向漫畫同人圈嘅佢，一直以嚟都以創作清新愛情小品為主，偶爾會畫吓熱血嘅戰鬥漫畫。憑住佢對漫畫創作嘅執着，練成以簡潔嘅線條，構成段段充滿青春感嘅作品。
不過作為一位漫畫家，最希望可以喺漫畫界出道，呢個時候嘅佢為咗作出突破，不但創作出首個成人漫畫短篇作品《疲累的午後》，更將作品自薦到成人漫畫月刊《COMIC 華漫》，結果獲得喺漫畫月刊發表作品嘅機會外，更從此開展成人漫畫創作生涯。據稱喺創作《疲累的午後》前，佢從未畫過女性嘅胸部，結果要喺旁人指導下，並且用咗極多時間先至完成作品。
今時今日已經熟習成漫創作嘅佢，不但畫風備受成漫迷熱愛，更憑住幽默又帶有溫馨感嘅劇情，以及女角色極具挑逗性嘅高潮眼神所吸引，因此佢嘅人氣冒起得極快。不過講到首本成漫單行本作品，卻要等到2014年5月推出嘅《發情情意結》，作品一推出即成為熱話。其後2015年8月推出嘅第二本單行本《顏色可聞》，更係佢嘅經典之作。由於佢嘅作品極受歡迎，故其創作嘅女角色經常被模型商睇中而製成Figure，足見佢嘅作品人氣有幾高。
作為utu首本發行嘅成漫單行本，書中收錄咗佢曾於成漫月刊《COMIC 失樂天》同《COMIC 華漫》上發表過嘅12篇作品，當中包括《繼母姦情》、《家庭教師～跟女兒的基礎補修授業～》、《家庭教師～跟媽媽的特別授業》、《長濱大橋的小瞳》、《魅惑的NTR》、《夏日的智菜》、《愛犬的工作》、《老師》、《表姐與微熱》、《疲累的午後》、《濃蜜咖啡屋》及《再重回長濱大橋的小瞳》，另外書中更收錄佢對每篇作品嘅解說及後記。單行本推出時不但引起搶購潮，更獲得成漫評論家嘅一致好評，尤其係《長濱大橋的小瞳》同《濃蜜咖啡屋》兩篇作品絕對唔可以錯過。
《長濱大橋的小瞳》係一個倒敍式故事，由男主角回憶18歲時嘅第一次開始。17歲時嘅男主角每日都要經過長濱大橋，並喺橋上邂逅呢道活動橋嘅兼職女操作員小瞳。原來早喺小瞳初嚟嘅第一日，男主角已經暗戀上呢位擁有火辣身材，並且衣着性感嘅活動橋操作員，其實小瞳亦早知呢位少年係特登兜路嚟見佢。如是者經過咗一年，啱啱18歲嘅男主角遇上小瞳，並且大膽向對方表白，雖然小瞳嫌男主角年紀太細，但實際行動卻又唔係咁樣。
《濃蜜咖啡屋》嘅主角分別有鹹濕老闆兼慶吾父親、巨乳女侍應優希同冷漠咖啡師慶吾。雖然慶吾父親有意撮合優希同慶吾，但優希一來不滿慶吾嘅高傲，慶吾則認為同優希太過熟落會影響工作，因此兩人嘅關係相當疏離。有日優希因為做錯嘢而感到相當失落，於是慶吾父親將優希交畀兒子作安慰。慶吾為咗幫優希重新振作，便讓對方品嘗新調校出嚟嘅白蘭地咖啡，估唔到優希竟然酒後亂性，結果由女方主導嘅情慾激戰就咁開始。
漫畫名稱：《發情情意結》
作者：utu
出版：WANI MAGAZINE
頁數：225頁
撰文：魂