今時今日，已經唔再只係得72行咁少，好似「鑑黃師」就係其中之一。大家都知內地不嬲對網絡色情資訊審查得相當嚴格，尤其係近年湧現嘅直播平台，當中有唔少涉及黃色內容，更係重點打擊對象。為咗令網絡變得清淨，不論官方定係直播平台本身都設有鑑黃師呢個職位，工作係審查網上嘅內容有冇涉及色情，而直播平台嘅鑑黃師更係針對性監察直播表演者嘅表演內容。早前有鑑黃師向媒體訴苦，指工作唔單止壓力大，更被另一半嫌棄。據呢位20歲嘅男性鑑黃師稱，喺3個月前開始做呢份工作，每當發現內容出現色情裸露畫面，佢必須第一時間進行屏蔽，如果限時內冇關閉有關直播，佢就會被警告，警告3次後便會扣500元人民幣工資。佢表示一晚至少要處理1,000條違規片，由於工作忙碌，壓力大同成日要睇住班性感女主播，故此不但被女友嫌棄，健康亦變得愈嚟愈差，最後更被公司解僱，卻無法獲得工傷賠償。原來據內地法律規定，「工傷」係指對職工造成直接、物理性嘅傷害，如果係精神上嘅傷害係乜都冇得賠償，真係陰公。