適當又適量嘅性愛令男女雙方關係更密切，亦令人情緒更加開心，而呢種正面效果最長可以持續48小時。女人好鍾意噴香水，但係有調查顯示有某幾種香水味會令男人失去性趣。另外，女仔穿着邊一種顏色嘅內衣最能夠引起男方嘅性趣呢？
好多夫妻關係唔得穩定，除咗因為結婚之後至發覺大家有好多生活習慣唔夾之外，仲有係性生活不協調，今晚老公想要，老婆就唔想畀，到第二晚老婆想要，老公就話想休息。其實有幸結為夫妻應該互相體諒同遷就對方，亦應該盡能力滿足對方嘅性需要。美國佛羅里達州立大學嘅心理學博士Andrea Meltzer表示，夫妻勤上床有好多益處，首先係可以令彼此關係較穩定同持久，亦可以令大家嘅情緒更加開心，而呢種正面效果最多可以長達48小時之久！另外，博士仲話做晨操可以提升免疫能力，亦會令人一整日都精神煥發，甚至係改善肌膚、頭髮以及指甲嘅質素。至於每星期做愛三次的話，有效預防心臟病及中風。所以話，為咗夫妻關係及健康着想，千祈唔好懶做愛呀！
相信好多男士都曾經被女仔鬧做「臭男人」，老實講身體發出臭味嘅男人的確令女仔討厭，咁身上發出香味嘅女性又係咪每個男人都鍾意呢？原來又唔係喎！出軌約會網站Victoria Milan繼早前訪問過女士們對於男人身上有異味嘅睇法之後，又訪問咗眾多男士以了解佢哋對於女士身上嘅香水味睇法，結果有66%受訪男士對於女士身上散發出類似甜品嘅香味，就會突然喪失性趣！點解呢？有男士表示聞到甜品味香水就會諗起老媽子下廚以及小朋友開心食甜品嘅場面，自然性趣盡失啦！咁女士用邊一種香水至能夠提升男士嘅性趣呢？最多男士答係花香味同生果香味，因為可以令佢哋覺得環境清幽寧靜，猶如置身於大自然一樣咁自由奔放。其次係運動型香水味，有男士話呢種味充滿野性，亦令人諗起做運動時身水身汗嘅情況，繼而聯想到香汗淋漓嘅靚女。第三就係帶辛香味嘅香水，因為呢種味道令男士覺得火辣同刺激。
我成日都覺得男女唔平等，以內衣為例，男士們嘅底衫通常都冇乜花款可以選擇，至於底褲呢？唔係孖煙囪、三角褲，就係Boxer，雖然有唔同顏色選擇，但係圖案可免則免，因為畀女仔見到會話你細路仔，相反，女仔嘅底褲或胸圍印有圖案，就會被讚有童真又可愛，你哋話係咪唔公平先？話時話，女仔着邊種顏色嘅內衣最能夠令男人性趣爆發呢？早前日本網站「Menjoy!」就進行過相關調查，結果最多男士鍾意嘅係黑色內衣褲，原因係黑色內衣令女性肌膚顯得更雪白，兩者襯托起嚟散發出一股難以形容嘅吸引力！其次就係紫色，男士認為紫色高貴又帶有威嚴，予人一種難接近嘅孤獨美感，正因為咁有挑戰性，令男性更想征服對方。第三係白色，純潔嘅白色予人整潔同純真嘅感覺，男人會覺得對方難以逃出其掌心，自己想點就點。
撰文：賢