散發迷人幽香味道嘅女人，令人心動，而男人嘅體味太濃，則會令女人唔想做床上運動。好多女仔都話男人滿腦子壞思想，但係有研究發現女人原來亦經常諗起床戰。提到進行床上運動，早前就有個來自日本嘅調查，了解一下男士如果想上床的話，事前會帶女方去邊個地方較易成事呢？
時值春季，好多動物都會進入發情期，而令動物進入發情狀態，除咗天時，仲有氣味，因為好多動物都會憑住嗅覺嚟選擇交配對象。而有研究指出人類是否想同異性上床，與氣味亦有一定關係。早前出軌網站Victoria Milan就呢個問題搵來5,071名來自世界12個不同國家嘅成年男女協助研究，結果發現當中有78%嘅女性表示如果聞到男方身上有異味的話，就會同對方講拜拜，寧願返屋企食自己好過！至於男士方面亦有半數人有相同見解。男士們有汗臭味當然唔好，咁用古龍水、止汗劑等香味嚟增強香氣又係咪好方法呢？有53%受訪女士認為男士唔用比較適合，亦有63%受訪男性表達相同答案，換言之大家都希望自然散發嘅體味比較吸引啦！
有首經典歌叫做《分分鐘需要你》，當中有句歌詞小弟喺溝女嘅時候都會用嚟氹對方開心，就係「有了你開心啲，乜都稱心滿意，鹹魚白菜也好好味……」其實，齋用歌名都已經冧死女喇！至於我分分鐘都需要對方，對方又係咪分分鐘都掛住我呢？早前有調查就顯示，有59%嘅受訪女性喺床戰嘅時候會諗起前度男友，至於48%男士亦會諗起前女友，我的天呀！另外俄亥俄大學亦有心理學家搵來283位年齡介乎18至25歲嘅學生幫手做研究，以了解一下男仔同女仔每日隔幾耐會諗起性愛、食物以及睡覺。男仔方面，每日隔28分鐘就會聯想到性愛，隔38分鐘會諗起食物，隔33分鐘則會想起睡覺。至於女仔，喺一日當中每51分鐘就會諗起性愛，每62分鐘諗起食物，每72分鐘諗起睡覺，換言之女仔每個鐘至少都會產生與性有關嘅念頭喎！
工欲善其事，必先利其器，想成功溝女真係心思同時間都唔可以懶去花呀！早前小弟相約女神去食晚飯，就係因為懶去做資料搜集，搵咗間評價麻麻地嘅西餐廳，女神有少少黑面，幸好小弟狗急跳牆……應該係人急智生至真，即刻問兄弟提供有情調嘅酒吧資料，然後同女神轉場，小弟又玩咗個啤牌魔術，最後成功畀我氹番佢開心，真係搞到我一額汗呀陰功！之不過，我對女神冇非份之想，當然懶少少都可以兜得番啦！但係如果想促成晚餐後上床呢件大工程又可以點呢？早前一個來自日本嘅調查就訪問咗500名成年男士，問佢哋對於呢餐晚飯去邊度食最能夠促成「好事」，最多人答嘅就係酒店內嘅餐廳，原因係呢類餐廳雖然係收費高昂，但係食物同服務都有質素，更重要嘅係順手撩對方上酒店房更為方便，仲可以幫對方排除畀人見到嘅顧慮！第二多人答嘅就係居酒屋，因為氣氛感染之下，對方多數都會肯飲酒，飲多兩杯自然容易成事啦！第三就係喺草地上野餐，感覺浪漫，而且呢類地方普遍冇乜人，談心以及摸吓手仔對方都唔會咁容易產生反感，畀你進行咗第一步，之後就水到渠成啦！
撰文：賢