食蠔可以壯陽，原來食魚及飲紅酒一樣有助性功效。未必個個都可以隨時搵到床上對手享受床戰，不過「食自己」就隨時都得喇，而自娛對身體仲有唔少益處添！家陣好多人都接受整容，喺美國進行陰部整容嘅女性更有上升趨勢。
有調查發現接近5成受訪女性正面對缺乏性趣及喺床上難以達到高潮嘅問題，更加有15%受訪者擔心情況持續發生的話，會摧毀佢哋嘅性生活！當然面對呢個問題最好梗係尋求醫生意見，又或者可以試吓一啲助性食物同飲品，可能會有幫助。專家表示深海魚除咗含蛋白質，亦有豐富嘅奧米加3，可以提升腦內嘅多巴胺水平，令人情緒高漲，交歡嘅時候更有Feel。若然係素食者，可以選擇南瓜子，同樣含奧米加3。另外，根據《性醫學雜誌》刊登嘅研究顯示，常飲紅酒嘅女性比起常飲其他酒精類飲品嘅女性，性慾更加旺盛，所以今晚不妨同女伴食個深海魚扒大餐，再嗒番杯紅酒，然後食個黑朱古力甜品，因為黑朱古力除咗提升多巴胺水平，亦可以降低壓力激素皮質醇水平及降血壓，冇咁大壓力，自然性趣大大提升啦！
喺早前嘅情人佳節，小弟喺面書見到好多網友同伴侶分享浪漫晚餐嘅照片，亦見到好多網民慨嘆要自己一個人度過，仲呼籲情侶們唔好上載咁多親密照，以免倍感孤單寂寞，等佢哋可以安心咁「食自己」。其實單身又有咩好怕喎，想去邊就去邊，做乜玩乜都冇人管，而且自娛對身體有益添！早前外國有調查訪問咗5,000名年齡介乎18至34歲嘅男女，當中有83%女性有自娛習慣，其中12%更會每日自娛。至於男受訪者方面，有94%都有自娛習慣，當中有35%表示每日都自娛一次。事實上，適量自娛絕對唔係壞事，因為有研究顯示男士每個月發射22次有助降低患上前列腺風險，而女性有自娛習慣亦可以降低尿道感染機會。另外，自娛會促進大腦釋放安多芬，呢種物質有助減壓，同時仲有紓緩痛症嘅作用添！
貪靚係女士嘅專利，近年女士們除咗繼續花錢消費化妝品、美容產品，亦有唔少會考慮進行大大小小嘅整容手術。提到整容，相關手術喺唔少國家都相當普遍，好似韓國同日本咁，最近國際美容外科學會（ISAPS）就發表咗一個有關2015年嘅整容手術統計，發現該年全球女性接受陰唇整形手術嘅數目高達95,000宗，排列整容手術排行榜第19位。而美國美容外科學會（ASAPS）亦指出，2015年時美國國內有9,000宗相關手術，比2014年上升16%。根據ASAPS嘅理事表示，現代女性愈來愈注重佢哋嘅身體外觀，唔單止係他人見到嘅部分，只有自己見到嘅私人部位亦同樣注重，所以可以預期未來會有更多人接受相關手術，令全身都符合自己嘅審美觀。
撰文：賢