鄭星音無心插柳

風采十足

做人最重要確立人生目標，但係命運嘅嘢真係好難講，每當你朝住目標進發時，命運卻會將你導向另一方向。好似於南韓首爾出生嘅鄭星音咁，最初佢諗住成為一位化妝師，點知喺2007年做兼職時，被模特兒經理人公司睇中，邀請佢做Model，當時仲係學生嘅佢，抱住一試無妨嘅心態，喺首爾車展上以車模身份處女登場，呢次演出令佢對模特兒工作有咗新嘅體會，而擁有火辣兼高挑身材嘅佢，加上一張Baby Face，獲得好評。不過，當時佢仍未有打算加入模特兒界發展。及至2009年，佢終於改變想法，投身模特兒工作，同年喺慶州千禧年車展中再次登場，呢次佢一樣咁受歡迎，成為眾人爭相拍攝嘅對象，人氣飆升。翌年佢參加超級賽車模特兒大賽，喺激烈嘅比賽中，最後獲得最具風采模特兒獎，自此佢更加努力工作，先後喺多個車展上亮相，並且成為車隊嘅專屬模特兒，跟賽車結下不解之緣。

具女人味

家陣喺展場上同賽車場上，都會發現到星音嘅身影，足見佢人氣高企。此外，佢亦朝向多方面發展，首先以商品模特兒身份，為多個商業產品拍攝廣告，同埋以Show Girl身份喺多個展覽會亮相；另外又為多本男士、汽車等雜誌拍攝火辣寫真。最近佢更踩入電競界，不但為各類型遊戲拍攝硬照，更化身電競女郎喺各個電競比賽中登場。唔知係咪因為工作時經常要Cosplay遊戲角色，竟然喚起佢對Cosplay嘅興趣，相信好快就會以Cosplayer嘅身份喺電玩展中示人，大家拭目以待。如果大家有留意嘅話，會發現今日嘅星音塊面比初出道時尖咗好多，而且女人味愈嚟愈濃，佢坦言以前成日畀人取笑面圓圓而感到唔開心，好彩家陣面形修長咗，仲意外地令自己更具女人味添！

精彩推介

簡介：只睇鄭星音個樣嘅話，真係估唔到佢已經喺車模界打滾咗咁多年，而作為資深車模嘅佢，最近動作多多，出席唔少活動，如果大家想知佢嘅近況，不妨去佢嘅Twitter睇睇。

網址：https://twitter.com/seonism

鄭星音Profile

出生地：首爾

身高：173cm

三圍：34、24、34

撰文：魂