喺香港，棒球屬於偏門運動，但係喺日本則備受熱捧，唔少電影同動漫都以棒球為題材。而日本寫真界同棒球亦有密切關係，因為好多女優都會擔任職業棒球比賽嘅開球禮嘉賓，就好似倉持明日香最近仲做埋職棒大使添！
所謂長路有盡時，又有云魚唔過塘唔肥，好多樂壇組合成員合作多年之後，實力培養得咁上下，就會考慮離開組合作個人發展，而呢個情況喺日本樂壇相當常見，尤其係AKB48、SKE48呢啲成員眾多嘅龐大組合添！雖然話大樹好遮蔭，但係成員離開嘅決定絕對唔係不智，一來無謂埋沒個人實力，二來年紀漸大亦唔想再同班新紮師妹為正選位置而爭崩頭。前AKB48成員倉持明日香實力非凡，當初決定離隊單飛發展，絕對係明智之舉！
今年27歲嘅明日香氣質冷艷，加上一雙凌厲眼神，往往令男人覺得佢難以相處，但其面上流露嘅攝人神韻，卻又令男人好想去親近，認真矛盾。加上阿妹天生一副火辣胴體，真係搞到男人流晒口水啦！明日香身材前凸後趷，婀娜又帶健美感，上圍對F奶又大又挺，彈力十足，配合冷艷面孔，冰火交融之下，產生出嘅誘惑實在令人難以抗拒。
明日香細個嘅夢想係做牙科護士，不過長大之後就希望可以上電視節目同大家見面，原因係有一日佢喺電視上見到爸爸，事關佢爸爸正係著名棒球選手倉持明！雖然明日香冇學爸爸打棒球而做咗藝能偶像，但係亦對棒球產生濃厚興趣，加上自小接受投球及擊球訓練，令佢身手敏捷，亦可能因為咁阿妹嘅身材先至咁健美又火辣。
加入藝能界後，明日香投考AKB48，希望成為其中一員，但係受到父母反對，幸好得到哥哥大力支持，最後成功冧掂父母「放行」，而明日香亦憑努力成為AKB48其中一位人氣成員。不過，唔知係咪因為壓力太大，佢曾經想過引退，好彩有哥哥嘅鼓勵同支持才放棄呢個念頭。直至2015年明日香決定離隊作個人發展，除咗拍寫真之外，亦有拍劇，作品包括《雖然是OL，但開始當女公關》。最近明日香仲成為電視頻道Sky PerfecTV嘅日本職棒大使，為棒球節目做主持及相關訪問，工作十分忙碌，但係佢就話愈忙愈開心，最緊要係大家繼續支持佢咁話，阿妹我梗係永遠撐你啦！
簡介：倉持明日香作個人發展之後工作相當多，大家想知道阿妹最近忙緊咩，就要Click入佢嘅Twitter留意最新消息喇。
網址：https://twitter.com/asuka_k911?lang=ja
撰文：賢