早前內地一間高級夜總會被查封，當中最引起關注嘅係究竟幕後老闆係邊個呢？另外，大家知唔知台灣色情業拜祭嘅神明又係邊個呢？至於日本有風俗店設喺公寓內，客人想玩必須要事先預約。
喺上個月底，北京一間著名高級夜總會因涉黃關係而被查封。呢間被喻為規模同消費都堪比當年天上人間嘅高檔夜總會，最為人注目嘅，唔單止係場內索女多，仲有係背後嘅神秘老闆。經內地傳媒查訪後，發覺呢間公司背景並非如傳聞咁厚，不過同佢有關係嘅企業及人物卻錯綜複雜。公司喺2010年註冊成立，註冊資本為1,800萬元人民幣，大股東係一間投資管理有限公司，而細股東則係一位姓趙人士。前者嘅法人代表姓李，既係富二代又係賽車手兼網貸公司老闆，至於姓趙人士身份神秘。再翻查資料，更發現原來公司過去6年曾換過8次投資人，法人亦換過3次，雖然佢哋係股東，但係俱樂部卻冇佢哋任何相關資訊。如此神秘，究竟幕後老闆係邊個呢？
唔少行業都會拜祭神明，好似黑白兩道拜關帝，咁大家知唔知台灣嘅色情行業拜乜嘢呢？答案就係「豬哥」，即係天蓬元帥，豬八戒是也。據民間傳說稱，豬八戒助唐僧取西經後，終於回歸仙班，但係鹹濕性格未改，經常偷落凡間偷食。因為咁嘅緣故，色情場所一律奉豬八戒做祖師爺，祈求每晚爆場。拜祭方法好簡單，早晚三炷香，拜祭時要大聲講「生意興隆、財源滾滾」，再燒埋印有豬八戒肖像嘅衣紙就完成，場內囡囡都要上香，仲要着得有咁性感得咁性感，先至會獲得好運。而囡囡還願時亦要着得性感，以美體答謝豬八戒嘅保佑。另外，亦有夜場同囡囡選擇拜狐仙，不過隨住時代推移，今時今日大部分夜場供奉土地。
日本風俗店嘅經營方式，不外乎店舖型同出張兩種，店舖型通常位於商業區內，不過近年卻興起一種名為「完全個室」嘅經營模式，最特別嘅地方，就係大多潛匿於公寓大廈之中。所謂「完全個室」，大家唔好誤以為係指一樓一，其實係指獨立房間。乜風俗店內嘅房間唔係獨立房間咩？佢呢度嘅意思只係突出每位風俗孃都有自己一個獨立房間而已。此外，有別於馬檻，由於呢種風俗店大多隱藏喺公寓大廈內，故此玩家去之前要事先預約，對方才會話畀玩家知地址、樓層及單位，而玩家去到大廈樓下時，風俗孃就會提供大門密碼。玩家知道咗密碼，下次咪可以直接上門？唔得喎！因為冇預約嘅話，就算玩家撳爆門鐘，風俗孃都係唔會開門。由於呢種風俗店夠隱蔽，交通方便，最重要係慳番舖租，又唔使咁多服務員，故此收費比較便宜，難怪深受玩家歡迎。
撰文：魂