自娛傷身 禁慾壯雄風？

精神啲持久啲

有人話自娛傷身，男人最好戒除呢個食自己嘅習慣。而早年有團體研究男士們禁慾嘅好處，得出嘅結果係忍住一個星期唔自娛，體內嘅睾丸酮水平會比正常高出45.7%，而睾丸酮水平夠高代表雄風強勁。不過，臨床性學專家Gloria Brame表示，呢個研究結果唔係太全面，因為另一個研究顯示出唔自娛一星期之後，睾丸酮水平的確會上升，但係隨之就會下降到正常水平。另外，專家就話適度自娛對男士有益處，因為有研究指出男士每星期洩射5次的話，令患上前列腺癌嘅風險降低33%。其次，自娛可以令大腦釋出多巴胺及催產素令人情緒放鬆，仲可以趁機鍛煉盆底肌肉，以增強持久力以及小弟弟嘅硬度。

機不離手

同成班老友食飯就最輕鬆，大家可以暢所欲言，就算講晒粗口一樣無所謂，食到成張枱都污糟晒亦無損大家嘅感情，之不過同女仔食飯，特別係第一次同新相識嘅女仔就一定要小心謹慎喇！最近日本有一個調查，訪問咗300位年齡介乎20至50歲嘅女性，問吓佢哋認為男仔邊一種行為會令佢哋決定唔會再同對方發展落去。最多人答嘅係食飯嘅時候手機不離手，喺女仔面前肆意咁用聊天程式同其他人傾偈，咁又係，女仔明明喺你面前都唔好好談吓心，反而掛住用手機同其他人溝通，梗係令女仔覺得你唔在乎佢啦！其次係一蚊都要計清楚，女仔其實唔介意食飯AA制，但係如果埋單條數為單數，例如621元，男士計足每人要畀310.5元，女仔一定會覺得你好小家囉！第三就係對餐廳嘅服務員態度惡劣，雖然顧客永遠是對的，但係行為粗魯又無禮，女仔梗係唔鍾意啦！再加上個女仔好可能本身都係做服務業工，感同身受之下一定覺得不快，各位男士記住喇！

自然為上

好多人都話同女仔拍拖離不開呃呃氹氹，將愛情視為為一場遊戲。其實拍拖都係希望搵到一個終身伴侶啫，唔使搞到好似爾虞我詐咁嚴重嘅，大家流於自然唔係最舒服、最開心咩？早前《人格與社會心理學雜誌》發表咗篇文章，綜合出多個研究結果，點出男士們如果想同女仔發展長久關係所需要嘅條件。第一點係自然為上，好多男人對住女仔都會特別扮嘢，扮到乜到識，仲要刻意隱瞞，面對女仔嘅問題都經過精密計算，研究指出女仔其實從你回覆時露出嘅反應當中，早已經知道你有隱瞞及作答不實，反而自然地對答先可以令女仔安心。第二點係大家用手機聊天程式溝通嘅時候反應要快，好多男仔喺拍拖開頭對女友特別着緊，一有訊息就會第一時間回覆，但係感情穩定之後就放軟手腳，其實要令大家嘅關係繼續「保鮮」，快速回覆訊息係其中一個關鍵。第三係細心聆聽，女仔嘅心理有時都幾複雜，細心聆聽對方嘅說話自然令女仔感受安慰。

撰文：賢