每年聖誕加元旦都係放長假嘅好時機，只係未到長假期，每到年底總係為咗「錢」而煩惱，又要買禮物又要準備過年。錢呢樣嘢，真係每時每刻都令人煩惱，今次字裏淫間就以錢同Money為主題，睇完呢啲同錢有關嘅情慾詞語，話唔定會開心番呢？
咪懶聰明以為「Sex Money」係指以錢換嚟嘅性關係，查實佢係解做有啲男士問人借錢，然後將借番嚟嘅錢搵女曳曳，當中所借嘅錢就叫做「Sex Money」。老實講，喺我哋嘅社會中，究竟有幾多人肯借錢畀人曳曳呢？其實英文俚語仲有個「Money Sex」，只係大家遇着佢嘅話應該會幾頭痕，皆因當中嘅「Money」係指價值不菲，意思指有對男女一夜情後，其中一方以此要挾，勒索對方大量金錢。對被勒索嘅一方嚟講，令佢後悔無比兼損失大量金錢嘅性愛就叫做「Money Sex」。
有啲電影導演會用「Money Shot」，嚟形容可以吸引戲迷目光嘅場面，只係英文俚語中卻有另一層意思，就係指顏面發射！咪住，乜顏面發射唔係「Cum Shot」或另一個俚語「Facial」咩？原來對四仔導演嚟講，顏面發射可以話係成套作品嘅重點，同時每次發射都係錢，皆因對四仔男演員嚟講，佢嘅人工係按發射次數嚟計，簡單嚟講即係「No Cum, No Pay」，你話係咪好重要先？美國嘅色情服務業中，囡囡固然會提出「Money Shot」服務，只係有時亦會向玩家建議「Safe Sex Money Shot」，不過佢同顏面發射一啲關係都冇，而係解做玩家戴住膠笠曳曳直到發射，然後將載滿精華嘅膠笠掹出嚟，喺囡囡面上拍打咁解。呢種玩法正唔正？咁就要問試過嘅玩家至知喇！
有套美國四仔同錢嘅關係相當密切，佢就係今年由著名四仔片廠Wicked Pictures推出嘅《Dirty Money》。呢套片除咗被AVN評為今年必睇嘅50套四仔外，仲由兩位著名四仔導演Los Scandalous及Monica聯手執導，搵嚟現今美國四仔界炙手可熱兼且被視為未來四仔天后嘅Casey Calvert擔正演出！1990年3月17日出生嘅Casey Calvert，2012年11月投身四仔界，先後喺多個四仔頒獎禮獲獎，喺今年初舉辦嘅XBIZ頒獎禮中，更獲得年度最佳脫星嘅提名。講番呢套四仔嘅劇情，主角Benjamin意外地獲得大筆金錢，佢就用嚟做盡壞事，結果被由Casey飾演嘅妓女纏住。劇情有晒起承轉合，帶出錢既係萬能，亦係萬惡嘅根源，冇錢更係罪大惡極嘅道理，絕對係套野心之作！
日本AV女優為興奮而演出，真係100個當中都未必有1個。咁佢哋為咗乜嘢拍AV呢？咪就係錢囉！雖然呢個理由係人都知，但極少女優會坦白承認，而喺2013年1月出道嘅吉川愛美，卻坦言佢演出嘅原因係因為鍾意錢，仲話佢鍾意錢嘅程度比任何人更強，真係夠晒坦白！事實上，呢位1994年3月15日於日本神奈川縣出生嘅AV女優，外在條件真係超掂，37H天然巨乳絕對係人間胸器，難怪當年以SOD專屬女優身份推出處女作《AV DEBUT吉川愛美》後，作品隨即榮登銷量榜頭5位。同年佢不但創下銷量10,000套嘅佳績，更喺SOD大獎中獲得優秀女優獎。2015年開始以單體女優身份活躍於AV界，更積極開拓台灣市場，並且喺今年9月初於台灣舉辦首個當地嘅攝影會。
撰文：魂