日本有唔少人氣AV女優，而佢哋嘅粉絲數目亦唔少，只係講到元祖色情偶像，絕對唔可以遺忘擁有超人氣嘅色情女優原悅子。呢位艷星憑住火辣情慾演出，被喻為日活粉紅電影黃金時期，其中一位棟樑級女優，更獲得色情界「大明神」嘅稱號，足見佢喺色情電影界嘅地位有幾咁舉足輕重。
原名廣橋壽美榮嘅原悅子，喺1956年4月1 日於日本新潟縣新潟市出生，1974年喺相模女子大學高等學部畢業後，投考電影公司大映株式會社所設嘅第一演技研究所學習演技。憑住清純可人嘅樣貌，好快就獲派演出電視劇《純愛山河 愛與誠》，當時藝名「廣橋紫羅蘭」嘅佢以演出電視劇為主。及至1976年，佢嘅事業生涯出現一個巨大嘅轉變，當時改名原悅子嘅佢，為寫真雜誌拍攝咗一輯性感寫真，火辣嘅造型唔單止令人眼前一亮，清純魅力及甜美嘅笑容，更震撼一眾男士。超性感嘅寫真並非只求一脫成名咁簡單，反而預告佢有更大膽嘅發展，事關佢同年參演著名粉紅電影製作公司大藏映畫嘅演出，憑住同年7月喺日本公映嘅處女情慾電影《麻雀PORN‧剃毛性合戰》，令佢嘅艷名傳遍整個日本，正式展開粉紅電影旅途。
由一位人氣清純系電視劇演員，到全裸演出嘅艷星，呢個轉變惹起極大爭議，只係佢卻少理閒言閒語，反而積極喺粉紅電影演出，加上處女情慾電影獲得佳績，於是大藏映畫再推出兩套作品《性感不毛地帶》同《新妻的性秘密》，兩套情慾裸露作品同樣得到極大回響，令原悅子奠定色情天后嘅地位。不過講到演出情慾電影嘅高峰期，就要數到1977年，佢先後演出《絕倫性天國‧一夫多妻》、《暴行燗熟未亡人》、《癡漢女色狂》、《蛇淫的精魂》、《淫蕩少女的告白》等合共22套粉紅電影，換言之幾乎每個月都有兩套作品上映。排山倒海嘅情慾演出，令佢人氣愈嚟愈高，因此被封為「大明神」嘅稱號！
一直以嚟唔少人都覺得奇怪，點解佢無喇喇走去拍裸戲呢？原來當年佢所屬經理人公司，發覺原悅子有唔少青年粉絲，但喺有消費能力嘅壯年市場卻唔大，於是問佢有冇興趣令事業嚟個突破性發展，喺對方安排加上自己亦希望事業有新轉機嘅情況下，成為人氣艷星。呢個決定係一着險棋，皆因一脫之後，壯年市場未必反應佳，反而有機會流失原有嘅粉絲。不過值得慶幸嘅係，佢不但冇因此而流失觀眾，反而贏得極大人氣，呢點可以喺佢嘅「原悅子Friend Club」會員上反映出嚟。自佢演出日活粉紅電影後，會員人數有增冇減，更突破70萬！除咗活躍於情慾電影嘅演出外，佢喺1978年參演舞台劇《愛與愛慾的幻想曲》，又喺1979年推出首本寫真集《原悅子特集號》，甫推出即賣斷市，其後所推出嘅寫真集《原悅子SPECIAL PART2》、《聽到一首海的歌》等，均獲得銷量佳績。
此外，擁有高度日本文學修養嘅佢，推出詩集《讚頌裸體之詩》，展現出佢嘅內涵。呢個時候佢嘅人氣究竟高到乜嘢程度呢？高到佢喺日本武道館舉辦咗一場規模巨大嘅簽名會，呢個成績亦係色情偶像中嘅第一人！人氣高企嘅同時，佢又積極參加學園祭嘅活動，令佢喺青年群體中獲得超高人氣。不過喺1980年佢宣布退出情慾電影界，重投電視劇懷抱，同年演出人氣電視劇《幼妻》，憑住呢套話題性作品成功入屋。喺1988年佢宣布引退，之後營辦大學生雜誌，現時則以學童保育指導員身份，從事兒童教育工作，變化真係好大呀！
撰文：魂